Inkota kirimbuzi iri mu mazina ya gikirisitu

Ibyo uvuga ni ukuri 100% ndemeranya nawe! Gukomera kwa ba Sekuruza bacu no ku izina n’igisobanuro cyaryo, Urwanda- Kwanda(kwaguka), byaturutse ku kumva neza abo aribo, icyerekezo cy’aho bashaka kugera ndetse n’indangagaciro zizabafasha kuhagera. Barabifashe babishyira mu bikorwa kandi babitoza abagiye babakomokaho uko ibihe byagiye biha ibindi kugeza umuzungu aje akabona ko intego ye atayigeraho atabanje gusenya ibyo byari imbogamizi kuri we. Ubu rero abubu twarayobotse tushyigikira kuba ingaruzwamuheto, uzi umuco nyarwanda akawubaha, uzi indangagaciro zawo akazigenderamo usanga yitwa umuturage, umuswa, n’andi mazina amugaya. Aho niho hava kwitwa amazina ashakiwe kuri murandasi n’andi y’amanyarwanda ariko mu by’ukuri adafite ibisobanuro bijyanye n’Urwanda twifuza. Kera abanyarwanda bari ba Karekezi, Gatanazi, Rutikanga, Mutiganda, Ntaganzwa, Rutwaza n’andi afite icyo avuze mu mibereho n’umuco nyarwanda. Ubu ni bake wabaza igisobanuro cya rimwe mu mazina navuze haruguru akakimenya. Uko bigenda bitakara buhoro buhoro ni nako ubunyarwanda butakarana n’umuco wabwo!Kandi utazi iyo ava ntamenya n’iyo ajya!