Igisirikare cya Repubulika ya demukarasi ya Congo, FARDC, cyatangaje ko gifite ubushobozi bwo kurinda ubutaka bw’iki gihugu uwagerageza kubwinjiramo mu buryo bunyuranyije n’amategeko, haba ku manywa cyangwa nijoro.
Ibi byatangajwe n’Umuvugizi wacyo ku rwego rw’intara ya Kivu y’Amajyaruguru, Lieutenant Colonel Guillaume Ndjike Kaiko kuri uyu wa 15 Ugushyingo 2023, agira ati: “FARDC bafite ubushobozi bwo kureba no kurinda ubutaka bw’igihugu ku manywa na nijoro.”
Ni amagambo yaherekejwe na videwo y’umunota n’amasegonda 58 yakozwe na FARDC, igaragaza icyo yise “ibihamya mu buryo bw’amashusho” by’ibyo Lt Col. Ndjike yatangarije kuri konte ye yo ku rubuga rwa X.
Muri iyi videwo, hagaragaramo abasirikare ba FARDC bohereza mu kirere akadege katagira abapilote gafata amashusho. Ubutumwa busobanura ibyako bugira buti: “Hamwe na drones zabo, FARDC bashobora gufata amashusho y’ibintu bibera ku rubuga.”
FARDC yasobanuye ko aka kadege koherejwe ku musozi muri teritwari ya Masisi, “gafotora abasirikare bambaye impuzankano y’u Rwanda” maze hifashishijwe imbunda zirimo ‘Mortiers’, haraswa ibisasu.
Guhera ku isegonda rya 41, FARDC yagaragaje muri aya mashusho imbunda ziremereye zirimo BM-21 na Tornado-G MLRS zirasa aho yise muri Masisi, gusa byagaragaye ko atari ukuri kuko ni akavidewo kamaze igihe yifashishije, igakuye kuri YouTube.
Hari Abanyekongo bashingiye kuri iyi videwo, bashima uburyo FARDC iri kwitwara mu ntambara ivuga ko ihanganyemo na “M23/RDF”, ariko hari n’abandi bamaganye ko yakoresheje akavidewo yakuye kuri YouTube.
Mu gihe ikoranabuhanga rikomeje gutera imbere, ku mbuga nkoranyambaga hatangazwa amakuru menshi, aho usanga ukuri kwivanze n’ibinyoma. Iyo hatabaye gushishoza, abantu bisanga baguye mu mutego wo kwizera ibitariho cyangwa ntibizere ukuri.
Tanga igitekerezo