Imikino ihuza abapolisi bo mu bihugu 8 biherereye mu karere ka Afurika y’iburasirazuba yatangiriye kuri uyu wa 21 Werurwe 2023 kuri sitade mpuzamahanga ya Kigali Pele Stadium i Nyamirambo mu mujyi wa Kigali.
Umuhango nyirizina watangijwe ku mugaragaro n’Umuyobozi Mukuru wa Polisi y’u Rwanda, DCG Felix Namuhoranye, watanze ubutumwa buha ikaze abapolisi baturutse mu bihugu bitandukanye ndetse n’abayobozi babo babaherekeje. Umushyitsi Mukuru yari Minisitiri w’umutekano w’imbere, Gasana Alfred.
Kuri iyi sitade habereye ibikorwa bitandukanye birimo imbyino z’Inganzo Ngari, iri torero rikaba ryakoze agashya ko kugaragaza imico yihariye iranga buri gihugu cyitabiriye: u Rwanda, u Burundi, Tanzania, Kenya, Uganda, Ethiopia, Sudani na Sudani y’Epfo.
Amatsinda y’abapolisi n’ibihugu ahagarariye yahawe umwanya, ariyerekana, buri ryose rifite ibendera imbere rigaragaza igihugu ryaturutsemo.
Ibirori byabaye mu gitondo, ku gicamunsi guhera saa cyenda haba umukino wa mbere wahuje ikipe ya Polisi y’u Rwanda n’iya Polisi y’u Burundi, aho abashyitsi batsinzwe ibitego 3 kuri 1. Uyu mukino wakurikiwe n’uwa Volleyball wabereye muri B.K Arena guhera saa kumi n’ebyiri, na none abashyitsi batsindwa seti eshatu ku busa.
Iyi mikino izarangira tariki ya 27 Werurwe 2023. Amakipe azaba yaritwaye neza kurusha ayandi azahabwa ibihembo.
Tanga igitekerezo