Ingabo z’u Rwanda ziri mu butumwa bw’Umuryango w’Abibumbye bwo kubungabunga amahoro muri Centrafrica (MINUSCA) kuri uyu wa Kane zambitswe imidali y’ishimwe kubera umwete zigaragaza mu bikorwa byo kugarura amahoro muri iki gihugu. Ibirori byabereye ku cyicaro gikuru cya Rwanbatt-12 giherereye mu nkambi ya SOCATEL M’poko mu murwa mukuru wa Bangui.
Umuyobozi w’Ubutumwa bw’Umuryango w’Abibumbye bugamije kugarura amahoro muri Centrafrica (MINUSCA), Ambasaderi Valentine Rugwabiza, yashimye umusanzu w’ingabo z’u Rwanda mu kugarura umutekano muri iki gihugu.
By’umwihariko yibanze ku kamaro k’ibyo bakorera abaturage ndetse n’ubutumwa bwo kugarura amahoro, ibintu ingabo z’u Rwanda zikora kinyamwuga ndetse n’umurava hagamijwe kuzuza inshingano zabo muri MINUSCA.
Lt Col Joseph Gatabazi, Umuyobozi wa Batayo Rwandbatt-12 yashimye uburyo bashyigikirwa ndetse n’inama bagirwa n’ubuyobozi bwa MINUSCA hakiyongeraho n’abafatanyabikorwa batandukanye bafasha abari mu butumwa bw’amahoro kuzuza inshingano zabo.
Yasabye abasirikare b’u Rwanda bose bari mu butumwa bw’amahoro gukomeza gukorana umurava mu gihe basigaje mu butumwa bw’amahoro.
Umuhango wo kwambika imidali Ingabo z’u Rwanda witabiriwe n’abayobozi batandukanye barimo n’abagize Guverinoma ya Repubulika ya Centrafrica, Amb Olivier Kayumba, uhagarariye u Rwanda muri CAR ndetse n’Abanyarwanda batuye muri iki gihugu.
Tanga igitekerezo