Imirwano hagati y’ingabo za Repubulika ya demukarasi ya Congo, abafatanyabikorwa bazo n’umutwe witwaje intwaro wa M23 yasubiriye muri gurupoma ya Kibumba, teritwari ya Nyiragongo, mu bilometero bike ugana mu mujyi wa Goma.
Perezida wa M23, Bertrand Bisimwa, kuri uyu wa 6 Ugushyingo 2023 yatangaje ko ingabo za RDC, abacancuro, FDLR n’imitwe ya Wazalendo ari rwo ruhande rwatangije iki gitero muri Kibumba, Buhumba no mu bice bihegereye.
Bisimwa yagize ati: “Mu gitondo cy’uyu wa mbere, hasubukuwe ibitero by’ihuriro ribi rya Kinshasa, FDLR, FARDC, abacancuro, abarwanyi b’inkeragutabara muri Kibumba, Buhumba no mu bice bihegereye, bishira mu byago ubuzima bw’abasivili barindwa na ARC/M23.”
Umuvugizi wa M23 ku rwego rwa politiki, Lawrence Kanyuka, na we yemeje aya makuru, agira ati: "Nyiragongo, abaturage b’abasivili muri iki gitondo batewe ubwoba n’irasa riremereye rya FARDC, FDLR, abacancuro, abarwanyi b’inkeragutabara n’inshuti zabo muri Kibumba, Buhumba no mu bice bihegereye. Turamenyesha amahanga ibi byago biterwa na Bwana Tshisekedi."
Imirwano ya Kibumba yaherukaga mu mpera z’ukwezi gushize, aho uruhande rwa Leta ya RDC rwakoreshaga intwaro ziremereye ndetse n’indege ya Sukhoi-25 mu guhangana n’abarwanyi ba M23, mu gihe hari impungenge z’uko uyu mutwe witwaje intwaro washoboraga gufata Goma.
Isubukuye nyuma y’aho muri Kitshanga na Bwiza, muri teritwari ya Masisi na ho yasubukuye kuri uyu wa 5 Ugushyingo 2023. Ubuyobozi bwa M23 buvuga ko uruhande rw’umwanzi rwahatakarije intwaro nyinshi kandi ko n’abasirikare b’Abarundi barurwanirira bafashwe.
Umuvugizi wa M23 ku rwego rwa gisirikare, Major Willy Ngoma, yatangarije BWIZA ko uyu mutwe witwaje intwaro urerekana vuba intwaro n’ibindi bikoresho bya gisirikare byafatiwe i Kitshanga na Masisi. Ni amakuru yanemejwe na mugenzi we, Lawrence Kanyuka.
Tanga igitekerezo