Tanzaniya: Umusozi wa Kilimanjaro ukomeje kwibasirwa n'inkongi z'umuriro

‎Inkongi nshya y'umuriro yongeye kwibasira umusozi wa Kilimanjaro mu majyaruguru ya Tanzaniya, nyuma y'ibyumweru bitatu undi muriro wari wibasiye uyu musozi wa mbere muremure muri Afurika uzimijwe.
‎
‎Abayobozi ba Tanzaniya bavuga ko umuriro watangiye mu gitondo cya kare kuri uyu wa Mbere mu gace ka Sangarini, ku ruhande rwa Kamwanga, kandi urimo gukwirakwira werekeza ku gipande cya Shira ku nkengero z'uburengerazuba bw'umusozi.
‎
Mu itangazo ryashyizwe ahagaragara kuri uyu wa Mbere, Catherine Mbena, umuvugizi w'Ikigo gishinzwe Pariki z'Igihugu cya Tanzaniya (TANAPA), yatangaje ko hashyizweho itsinda rigizwe n'abazimya umuriro, abashinzwe kubungabunga ibidukikije, abakozi bo mu rwego rw'ubukerarugendo, n'abaturage bo muri ako gace kugira ngo bagerageze guhagarika umuriro.
‎
Mbena yavuze ko icyateye inkongi kitaramenyekana kandi ko iperereza ryatangiye.
‎
Bivugwa ko umuriro uri gutwika hafi ya Plateau ya Shira ku butumburuke bwa metero 3.800. Abazimya umuriro barimo guhangana n'umuyaga mwinshi n'ibimera bishobora gushya mu buryo bworoshye.
‎
Abayobozi bagaragaza ko ibikorwa by'ubukerarugendo, harimo no kuzamuka umusozi wa Kilimanjaro, bikomeje nk'uko bisanzwe. Mbena yongeyeho ko, kubera imvura yatangiye kugwa mu bice bimwe na bimwe byo mu majyaruguru ya Tanzaniya, hari icyizere ko umuriro uzazima vuba.
‎
‎Iyi nkongi ije ikurikira indi nkongi y’umuriro yamaze hafi ibyumweru bibiri ku gice cy’uburasirazuba bw'umusozi, ikangiza ibimera ku buso bwa hegitari zisaga 1.800. Abayobozi bari bavuze ko inkongi y’umuriro yabanje ishobora kuba yaratewe n’ibikorwa bya muntu.