Masisi: Inyeshyamba za wazalendo na FDLR zakubitiwe Bitoyi zibura kirengera ‎

Kuva saa moya n’igice za mu gitondo (7:30) kuri uyu wa Mbere, abarwanyi ba M23 baravugwaho gukomeza gukoresha indege za drones z'ubwiyahuzi mu kugaba ibitero ku birindiro by'inyeshyamba za wazalendo na FDLR mu gace ka Bitoyi mu Murenge wa Ufamandu muri Teritwari ya Masisi.
‎
‎Umuyobozi w’ibikorwa bya gisirikare bya FARDC n’ubuyobozi bukuru bw'ingabo biravugwa ko bananiwe gutanga ubufasha bwihuse ku nyeshyamba za Wazalendo na FDLR zimerewe nabi.
‎
‎Amakuru aturuka ku ruhande rwegereye ubutegetsi aravuga ko nyuma y’amasaha 72 y’ibitero bya AFC/M23, inyeshyamba za Wazalendo zakomeje kugumana ibirindiro byazo ahitwa Miko, nubwo ibintu bikomeye cyane.
‎
‎Izi nyeshyamba za Wazalendo zikorera muri ako gace ziravuga ko zasizwe zonyine, nta bufasha, n'Ingabo za FARDC zo mu Karere ka 34 ka Gisirikare muri Kivu y’Amajyaruguru n'ubuyobozi bushinzwe ibikorwa bya gisirikare.
‎
‎Kwiyongera kw’ibitero byo ku butaka n’ibitero by’indege za drones za kamikaze byarushijeho kuzahaza ihuriro rirwanira ubutegetsi bwa Kinshasa muri za teritwari za Masisi na Walikale.
‎
‎Andi makuru aturuka ahabera imirwano kuri uyu wa Mbere, avuga ko imirambo y’abarwanyi ba FDLR na Wazalendo bari i Bitoyi (mu Murenge wa Ufamandu, Teritwari ya Masisi) ubu irambaraye mu mihanda nyuma yo kugotwa no kwivuganwa n’abarwanyi b'umutwe wa AFC/M23.
‎
Amakuru atandukanye avuga ko hari imirambo iri hagati ya 50 na 70 mu mihanda.
‎
‎Biravugwa kandi ko mu gitondo cyo kuri uyu wa Mbere, drone ya kamikaze ya AFC/ M23 yibasiye ikibuga cy’indege cya Pinga muri Teritwari ya Walikale, ariko amakuru arambuye ku ngaruka zacyo ntarashyirwa ahagaragara.