Ibirori bya MTV Video Music Awards (VMAs) 2026 byabereye i Los Angeles ku Cyumweru tariki ya 27 Nzeri 2026, aho abahanzi bakomeye ku isi bahuriye mu birori byari byitezwe n’abakunzi b’umuziki.
Umuhanzi Madonna ni we wagaragaje umusaruro ukomeye muri iri joro, atahana ibihembo birindwi, birimo bitatu yatwaye mu byiciro by’ingenzi: Artist of the Year, Best Dance ndetse na Best Collaboration, igihembo yahawe kubera indirimbo “Bring Your Love” yakoranye na Sabrina Carpenter.
Taylor Swift na we yagize ijoro rikomeye, aho yahawe igihembo cya mbere cyatanzwe muri VMAs cyiswe Artist Director Honors. Yaje no kwegukana igihembo gikomeye cy’umugoroba, Video of the Year, kubera amashusho y’indirimbo “The Fate of Ophelia”. Yongeye kwegukana Best Direction kubera “Opalite”.
Swift yari asanzwe ari umwe mu bahanzi bafite amateka akomeye muri ibi bihembo, aho yari amaze gutwara ibihembo bya Moon Person 30 mbere y’iri rushanwa.
Itsinda ryo muri Koreya y’Epfo, BTS, ryegukanye Song of the Year kubera indirimbo “Swim”, ndetse rihabwa na Best K-Pop hamwe na Best Group.
Umuhanzi LISA na we yatangiye ibihembo neza, kuko ari we wegukanye igihembo cya mbere cyatanzwe muri iri joro, Best Pop, kubera indirimbo “Dream” yakoranye na Kentaro Sakaguchi.
Mu cyiciro cya Best New Artist, igihembo cyahawe Sienna Spiro, nyuma y’amajwi yatanzwe n’abafana mu gihe cy’ibirori.
Mu byiciro bitandukanye, Cardi B na Kehlani begukanye Best Hip-Hop kubera “Safe”, mu gihe Bruno Mars yatwaye Best R&B kubera “I Just Might”.
Olivia Rodrigo yegukanye Best Alternative kubera “the cure”, naho Bad Bunny atwara Best Latin kubera “NUEVAYoL”.
Mu cyiciro cya Best Country, igihembo cyahawe Ella Langley kubera “Choosin’ Texas”.
Ku ruhande rw’ibyiciro bya tekiniki, Taylor Swift yatwaye Best Direction, PinkPantheress na Zara Larsson begukana Best Art Direction, naho Madonna atwara Best Cinematography na Best Choreography.
Sabrina Carpenter we yegukanye Best Editing, mu gihe Ariana Grande yatwaye Best Visual Effects.
Madonna yongeyeho ikindi gihembo gikomeye ubwo album ye “Confessions II” yegukanaga Best Album.
Muri Song of Summer, igihembo cyahawe Ariana Grande kubera “Hate That I Made You Love Me”.
Ibirori bya VMAs 2026 byayobowe na Snoop Dogg, ndetse byaranzwe n’ibitaramo by’abahanzi batandukanye, barimo Madonna, Kacey Musgraves, RAYE, SOMBR, Teddy Swims, LISA, Sienna Spiro na Shaboozey.
Itsinda Nirvana na ryo ryahawe Video Vanguard Award, mu rwego rwo kwizihiza uruhare rwaryo mu mateka y’umuziki n’amashusho y’indirimbo.