Kenya: Ruto yasubije Kenyatta wemeza ko Odinga ari we watsinze amatora ya 2022

‎‎Perezida William Ruto asa n’uwatanze igisubizo ku magambo aherutse kuvugwa n'uwahoze ari perezida, Uhuru Kenyatta, avuga ko Raila Odinga ari we watsinze amatora ya Perezida yo mu 2022, aho yasabye abayobozi b'abanyapolitiki kwirinda amagambo akaze cyangwa ashobora guteza ikibazo bavuga mu ruhame.
‎
Ubwo yari mu materaniro yo kuri iki Cyumweru, itariki ya 27 Nzeri, mu rusengero rw'Abapentekote ruherereye i Mwatate mu Ntara ya Taita Taveta, Ruto yasabye abayobozi kurangwa n’ubushishozi no kuzirikana ingaruka amagambo yabo agira ku baturage.
‎
Perezida yihanangirije abayobozi abasaba kwirinda gutanga ibitekerezo cyangwa kuvuga amagambo igihe banyoye inzoga cyangwa igihe bari mu bihe byo kwibeshya no kutamenya neza ibyo bakora, avuga ko imvugo nk’izo zishobora guteza ibibazo bitari ngombwa.
‎
‎Ati: "Nk’abayobozi, iyo uri umuyobozi, ugomba kuba icyitegererezo. Ntushobora kuba umuyobozi hanyuma ukajya mu nama ikomeye utari gutekereza neza cyangwa uvuga ibintu bidafite umurongo, nyamara ugasaba urubyiruko cyangwa bagenzi bawe b’abayobozi kugira imyitwarire myiza,"
‎
Ruto yongeyeho ko abayobozi bagomba kugira imyitwarire inoze kandi bakitondera ibyo bavuga, asa n’uwerekeza ku mpaka zongeye kuvuka ku bijyanye n’amatora yo mu 2022 amaze imyaka ine abaye.
‎
"Bavandimwe bayobozi, nimucyo tugire imyitwarire irimo kugira inshingano. Ujya aho ngaho udatekereje neza, ukavuga amagambo avuguruzanya kandi adafite icyo asobanura. Nk’abayobozi, nimucyo tube abantu biyubashye, bicisha bugufi, kandi tumenye ko hari abantu benshi badushoramo imbaraga n’amikoro kandi badukurikirana," ni ko yakomeje avuga.
‎
‎Ibi yavuze nyuma y'iminsi mike Uhuru Kenyatta avuze ko akomeje kwemeza ko Raila yatsinze amatora ya perezida yo mu 2022. Uwahoze ari Perezida yabitangaje mu nama y'ishyaka rya Jubilee i Nairobi ubwo yumvikanishaga impamvu yafashe icyemezo cyo gushyigikira Raila ku mwanya wa perezida.
‎
Uhuru yavuze ko we n'abandi bayobozi bakoze ibishoboka byose kugira ngo bashyigikire Raila kandi akomeza kuvuga ko nyakwigendera wari umuyobozi w'ishyaka ritavuga rumwe n'ubutegetsi yabonye amajwi ahagije yo gutsindira umwanya wa perezida. Yavuze kandi ko azi uko ibintu byagenze nyuma y'amatora.
‎
Ibi byateje ibibazo mu bayobozi b'abanyapolitiki, nk'aho Umunyamabanga Mukuru w'ishyaka UDA, Hassan Omar yamaganye ibyo Uhuru yavuze kandi akomeza kuvuga ko Ruto yatsinze amatora ya 2022.
‎
Abayobozi ba UDA banabajije impamvu uwahoze ari Perezida yagaruye ibyavuye mu matora nyuma y'imyaka myinshi nk'uko inkuru dukesha kenyans.co.ke ikomeza ivuga.
‎
‎Oburu Oginga, umwe mu bayobozi b’ishyaka ODM, na we yagize icyo avuga ku magambo ya Uhuru, aho yibajije impamvu uwahoze ari Perezida yashyikirije ubutegetsi Ruto niba yari yizeye ko Raila ari we watsinze amatora.
‎
Oburu yavuze ko ayo magambo yongeye kuzamura ibibazo bijyanye n’amatora ya Perezida yo mu 2022. Nk’uko bigaragazwa n’imibare yashyizwe ahagaragara, Ruto yatangajwe nk’uwatsinze amatora ya Perezida yo muri Kanama 2022, aho yagize amajwi 7,176,141 mu gihe Raila yari afite 6,942,930. Nyuma yaho, Urukiko rw’Ikirenga rwemeje intsinzi ya William Ruto.