Lt. Herbert Mabonga Matanda uvuga ko yinjiye mu Ngabo za Uganda (UPDF) ku itariki ya 8 Kanama 2011 akaba yarabaye umukozi ushinzwe ubutasi mu Kigo gikuru gishinzwe ubutasi n’umutekano w’ingabo (Defence Intelligence and Security Headquarters), cyahoze cyitwa Chieftaincy of Military Intelligence and Security (CMI) yavuze ko hari Abanyarwanda babiri; Kayitare Fred wari uzwi nka Kamaliza na Magezi Emmanuel, bishwe n'inzego z'ubutasi za gisirikare za Uganda.
Inyandiko ndende yo kuwa 30 Nzeri 2026 ikomeje gucicikana, igaruka ku ngingo nyinshi zirimo ahanini ibijyanye n'umutekano na politiki ya Uganda.
Ivuga kandi ko hari Abanyamahanga bagizwe ibitambo biturutse ku mikorere mibi ya CMI/JAT. Itanga urugero rw’aba Banyarwanda babiri Lt Mabonga avuga ko biciwe ahitwa Mbuya bikozwe na CMI/JAT.
Uyu musirikare avuga ko Kayitare Fred yishwe mu 2023 naho Magezi Emmanuel akicwa mu 2020. Iyi ntasi ntivuga impamvu yaba yaratumye aba Banyarwanda bicwa.
Inyandiko ye ikomeza ivuga ko hari Abanyarwanda bamwe bajyanywe ku gahato cyangwa birukanwa muri Uganda ndetse igashinja bamwe mu bayobozi bakuru mu nzego z'umutekano za Uganda kubikora mu nyungu zabo.
Uyu uvuga ko yanabaye 'Aide' wa Gen. Aronda Nyakairima mu 2014/15, ndetse n'uwaBrig. Gen. Tom Kabuye Kikoyo mu 2019/25, avuga ko yamaze guhunga kuko z'umutekano we na we wari ugeramiwe.
BWIZA ntiyabashije kugenzura mu buryo bwigenga ibikubiye muri iyi nkuru.
Igisirikare cya Uganda ntacyo kiratangaza ku byavuzwe na Lt. Mabonga.
Hagati aho ariko, iyi nyandiko yasamiwe hejuru n'abatavuga rumwe n'ubutegetsi muri Uganda. Barashima Lt. Mabonga kuko uretse iyi nyandiko BWIZA yabonye, hari n'amashusho y'ibanga yafatiwe mu nzu zikorerwamo iyicarubozo muri Kampala n'inyandiko zikubiyemo abagiye bahafungirwa. Robert Kyagulanyi Ssentamu uzwi nka Bobi Wine umwe mu badacana uwaka na Kampala avuga ko azikesha Lt. Mabonga.
Uyu musirikare yongeye kugaragara mu mashusho ashimangira byinshi mu bikubiye mu nyandiko ndende BWIZA yabonye.