Kuri iki Cyumweru gishize, Umugaba w’Ingabo za Ethiopia yashinje Eritrea na Sudani gushyigikira imitwe yitwaje intwaro irwanya ubutegetsi bwa Addis Abeba mu majyaruguru y’igihugu. Ibi biravugwa mu gihe mu ntambara iheruka Ingabo za Eritrea zafashije iza Ethiopia kurwanya TPLF.
Imirwano ikaze yongeye kubura hagati y’umutwe wa TPLF (Tigray People's Liberation Front) na guverinoma nkuru kuva ku wa Gatatu, bituma habaho impungenge zo gusubira mu ntambara y’imbere mu gihugu nk’iyabaye hagati ya 2020 na 2022, aho abantu bagera ku 600,000 bapfuye.
TPLF yafashe ibibuga by’indege inatangiza ibitero mu ntara zituranye za Afar na Amhara, ivuga ko irimo kurwana "intambara yo kwirwanaho" igamije kurwanya guverinoma ya Minisitiri w’Intebe Abiy Ahmed.
Amakuru yatangajwe na bamwe mu bakora ibikorwa by’ubutabazi avuga ko Umujyi wa Erebti wo mu Ntara ya Afar, wegereye umupaka na Tigray, wafashwe n’inyeshyamba ku Cyumweru nyuma yo kuraswaho ibisasu biremereye.
Ubu TPLF ikomeje kwegera imbere yerekeza mu Mujyi wa Afdeera, uherereye ku ntera ya kilometero zigera ku 100 (miles 60) ugana mu burasirazuba. Amakuru avuga ko abantu bagera nibura ku 150,000 bavuye mu byabo muri Afar, ariko biragoye gutanga imibare nyayo.
Mu ijambo rye ryatambutse kuri channel ya YouTube y'igisirikare, Umuyobozi w’Ingabo za Ethiopia, Field Marshal Birhanu Jula, yagize ati: "Turimo kurwanya ingabo ziteguye kandi zifatanyije kugira ngo zikorere inyungu z’imbaraga z'amahanga.
Yakomeje agira ati: "Ntabwo Shaebia (Eritrea) cyangwa TPLF bashobora kubigeraho bonyine, nubwo baba bafatanyije, keretse bashyigikiwe, bafashwa kandi bagahabwa ibikoresho na Sudani, Misiri n’izindi mbaraga zo hanze."
Igitero kuri televiziyo
TPLF yifatanyije n’imitwe irindwi yitwaje intwaro hirya no hino mu gihugu, kandi isa nkaho isubiramo uburyo bwakoreshejwe mu ntambara iheruka bwo gusunikira ingabo za leta mu majyepfo inyura muri Amhara yerekeza Addis Ababa.
Igitero cyayo muri Afar cyari kigamije inzira igaburira igihugu iva muri Djibouti, ahanyuzwa ibicuruzwa hafi ya byose bitumizwa mu mahanga bya Ethiopia, harimo na lisansi.
Ikicaro gikuru cya Tigrai TV, kibonwa nk'ahantu heza ho gukorera ku bategetsi b’inyeshyamba mu murwa mukuru wa Tigray, Mekelle, cyarashweho n’indege itagira abapilote ku Cyumweru.
"Twumvise urusaku rwinshi rw’igitero cya drone maze duhunga inyubako," umunyamakuru wo kuri iyi radiyo yabibwiye ibi AFP, asaba kudatangaza amazina ye.
Iyi radiyo ntacyo yatangaje kuri iki gitero. Amafoto yafashwe n'umunyamakuru wo muri ako gace yagaragaje inyubako ya Tigrai TV yangiritse kandi inkuta zabaye umukara, mu gihe amadirishya menshi yaturitse kubera igisasu.