Indege nshya y'Abashinwa ikoresha amashanyarazi itwara abagenzi yagiye mu kirere irangiza urugendo rwayo rwa mbere itwawe n’abantu.
Iyi ndege ifite uburemere bwa toni 10 yagurutse hejuru ya Binzhou, Intara ya Shandong mu burasirazuba bw'u Bushinwa, kuwa Gatandatu. Abapilote babiri n'umuhanga mu igerageza ry'indege nib o bari mu ndege.
Igeragezwa ryamaze igihe kitageze ku isaha, ryamaze iminota 16 n'amasegonda 38 mu kirere kandi indege yagenze kilometero 60.4.
Itsinda ryakoze iyi ndege ryavuze ko byose byagenze neza, ibimenyetso byose by'imikorere bihuye n'ibyo bari biteze.
Igeragezwa rikurikira irya mbere ry'indege itagira abapilote ryakozwe ku itariki ya 2 Gashyantare nk'uko inkuru dukesha CGTN ikomeza ivuga.
Iyi ndege yakozwe na COMAC, Commercial Aircraft Corporation of China, yiswe CE-25A ni yo ndege ya mbere y’ubucuruzi ikoresha amashanyarazi ikorewe muri iyo sosiyete.
Yagenewe cyane cyane ingendo ngufi hagati y’imijyi, ishobora gutwara abagenzi bagera kuri 19 ku muvuduko wa kilometero 300 ku isaha, ku butumburuke bwa metero 2.400 kandi ishobora kugenda kilometero 400.
Inyuguti "C" mu izina ryayo ihagarariye u Bushinwa na COMAC, "E" isobanura amashanyarazi (ikoreshwa na ‘ventilateur’ ifite imiyoboro hejuru y’amababa), naho "25" igaragaza ko ikurikiza amabwiriza akomeye y’u Bushinwa yo mu Gice cya 25 cy’amabwiriza agenga ibijyanye n’umutekano w’indege. Inyuguti "A" isobanura indege ya mbere muri uru rwego.
Iyi ndege ni igikorwa cyahuje COMAC, ikigo gikomeye ku Isi gikora bateri CATL, Kaminuza ya Shanghai Jiao Tong n'abandi bafatanyabikorwa.
Hamwe n'ingendo 19 z'igerageza zakozwe nta bapilote barimo, abashinzwe kugenzura bemeye ubusabe bwayo bwo guhabwa icyemezo, intambwe ikomeye mu gutuma indege yemererwa gukoreshwa mu bucuruzi.
Urugendo rwagenze neza rugaragaza intambwe ikomeye mu iterambere ry'u Bushinwa mu guteza imbere ikoreshwa ry’indege zikoresha amashanyarazi.

