Poivron, izwi kandi ku izina rya puwavuro, ni rumwe mu mboga zikoreshwa cyane mu gutegura amafunguro atandukanye. Ikoreshwa nk’ikirungo mu masosi, mu mboga zivanze, muri salade ndetse ishobora no kuribwa ari mbisi.
Nubwo hari abayifata nk’ikirungo gisanzwe cyo kongera uburyohe bw’ibiryo, poivron ikungahaye ku ntungamubiri zitandukanye zigira uruhare mu mikorere myiza y’umubiri, zirimo vitamine A, C, E na K, ndetse na vitamine zo mu itsinda rya B.
Kimwe mu byiza by'ayo ni uko ikungahaye kuri vitamine C, igira uruhare mu mikorere myiza y’ubudahangarwa bw’umubiri. Iyi vitamine kandi ifasha umubiri gukora no gusana utunyangingo, ndetse ikanafasha mu kwinjiza ubutare (fer) buboneka mu biribwa.
Poivron kandi irimo beta-carotene, ikinyabutabire umubiri ushobora guhinduramo vitamine A. Iyi vitamine ifasha mu mikorere myiza y’amaso, cyane cyane mu kureba ahari urumuri ruke, ndetse ikagira uruhare mu kubungabunga uruhu n'ubudahangarwa.
Inakungahaye kuri vitamine E, izwiho kurinda uturemangingo tw’umubiri kwangizwa n’ibintu byitwa free radicals. Ibi bifasha mu kurinda umubiri kwangirika guterwa n'ibikorwa bisanzwe bibera mu turemangingo.
Undi munyu ngugu uboneka muri poivron ni potasiyumu, igira uruhare mu mikorere y'imitsi, imikaya no kuringaniza amazi mu mubiri.
Poivron kandi irimo vitamine K, ifasha amaraso kuvura igihe umuntu yakomeretse, ikanagira uruhare mu kubungabunga amagufwa.
Poivron irimo vitamine B6, ifasha umubiri gutunganya poroteyine, gukora insoro zitukura no kubungabunga imikorere y'ubwonko n'urwungano rw'imyakura.
Harimo kandi vitamine B9 (folate), ingenzi mu ikorwa ry'uturemangingo dushya. Iyi vitamine ni ingenzi cyane ku bagore batwite kuko igira uruhare mu mikurire myiza y'umwana uri mu nda, cyane cyane mu ikorwa ry'ubwonko n'umugongo.
Vitamine B1 (thiamine), B2 (riboflavin), B3 (niacin) na B5 (pantothenic acid) na zo ziboneka muri poivron. Zifasha umubiri gukoresha neza ingufu zituruka mu biribwa, gukora imisemburo no kubungabunga imikorere y'ingingo zitandukanye.
Kubera ko poivron irimo intungamubiri zitandukanye kandi ikaba ifite calories nke, ishobora kuba igice cy'ingenzi cy'indyo yuzuye.