Mu matora yo muri Israel nta ruhande rwabashije kugira ubwiganze, mu nteko ishinga amategeko, yaba urwa Minisitiri w’Intebe Benjamin Netanyahu cyangwa abatavuga rumwe n’ubutegetsi nk’uko byatangajwe n’itangazamakuru ryo mu gihugu.
Ubwo ibyavuye mu matora by’agateganyo,99%, byatangazwaga kuwa Kane, abanyapolitiki batavuga rumwe n’ubutegetsi bateraniye hamwe kugira ngo basuzume uburyo bwo gushyiraho ihuriro.
Uruhande rwa Netanyahu rwagize imyanya 53 mu nteko ishinga amategeko (Knesset) igizwe n’abanyamuryango 120 mu gihe ihuriro ritavuga rumwe n’ubutegetsi riyobowe na Gadi Eisenkot ryabonye imyanya 48, nk’uko byatangajwe n’Ibiro Ntaramakuru bya Israel, Haaretz.
Hagati aho, amashyaka yo ku rutonde rw’abarabu bo muri Israel yagize imyanya 19 yose hamwe, nk’uko byakomeje bivugwa.
Bivuze ko ihuriro rya Netanyahu n’amashyaka atavuga rumwe n’ubutegetsi bose bananiwe gutsindira imyanya 61 isabwa kugira ngo habe ubwiganze mu nteko ishinga amategeko.
Ibyavuye mu matora bya nyuma bizatangazwa bitarenze kuwa Gatatu utaha.
Kugeza kuri iyo tariki, ibyavuye mu matora bishobora guhinduka.
Amatora yo kuwa Kabiri, aya mbere kuva ku itariki ya 7 Ukwakira 2023, ubwo amajyepfo ya Israel yagabwagaho igitero ndetse na nyuma y'itangizwa ry'intambara yo muri Gaza, yari yafashwe cyane nk'amatora ya referandumu ku buyobozi bwa Netanyahu.
Inkuru yanditswe na: Denis Nsengiyumva
Umunyamakuru wa BWIZA.COM wanditse inkuru 11,310.