Perezida w’u Bushinwa, Xi Jinping, na mugenzi we w’u Burusiya, Vladimir Putin, bahuriye mu mujyi wa Shenzhen bagirana ibiganiro, mbere y’uko Perezida wa Leta Zunze Ubumwe za Amerika, Donald Trump, ahagera mu rwego rwo kwitabira inama ihuza abakuru b’ibihugu bitatu.
Iyi nama iteganyijwe ku wa Kane tariki ya 19 Ugushyingo 2026, akaba ari ubwa mbere abakuru b’ibihugu bya Amerika, u Bushinwa n’u Burusiya bahurira mu nama ihuriweho na bose.
Mu biganiro byamaze amasaha arenga abiri, Xi Jinping yavuze ko umubano w’u Bushinwa n’u Burusiya ukomeje gukomera nubwo ibihugu byombi byagiye bihura n’ibibazo bitandukanye.
Yashimangiye ko ibihugu byombi bikwiye gukomeza gushyigikira gahunda y’isi igizwe n’ibihugu byinshi bifite ijambo mu miyoborere mpuzamahanga, aho Amerika itaba ari yo ifite ijambo rikomeye kurusha ibindi.
Putin na we yavuze ko inama iteganyijwe na Trump ifite amahirwe yo kubyara umusaruro ukomeye.
Biteganyijwe ko mu biganiro by’abakuru b’ibi bihugu hazibandwa ku mubano mpuzamahanga, ubucuruzi, umutekano n'uburyo bwo kugenzura intwaro kirimbuzi.
Ibiganiro bya Xi na Putin bibaye mbere y’uko Trump agera mu Bushinwa, mu gihe umwuka w’ubushyamirane hagati ya Washington na Beijing ukomeje kugaragara, cyane cyane ku bijyanye n’ubucuruzi n’ikoranabuhanga.
Uru ruzinduko rwa Trump muri Aziya rurimo no guhura na Perezida wa Philippines, Ferdinand Marcos Jr., aho ibihugu byombi byatangaje ko byagiranye amasezerano mashya y’ubufatanye mu bijyanye n’ingufu n’umutekano w’ibiribwa.


