Umukada mukuru mu ishyaka rya UDPS, Peter Kazadi, wahoze ari minisitiri w'umutekano, yashinje Joseph Kabila wahoze ari Perezida wa Repubulika ya Demokarasi ya Congo kuba ari we wategetse irekurwa ry’abayobozi ba M23 bari bafungiwe i Kinshasa.
Yabitangaje ku wa Gatanu, mu kiganiro cyakorewe kuri Space cyateguwe n’umunyamakuru Stanis Bujakera Tshiamala, aho yasubizaga uwakurikiranaga iki kiganiro wabajije ibijyanye n'irekurwa ry'abantu nka Gen. Byamungu na Nsabimana, bari bahamijwe ibyaha bagafungwa igihe Félix Tshisekedi yageraga ku butegetsi.
Nk’uko Peter Kazadi abitangaza, ngo Joseph Kabila yari yashyize umukono ku cyemezo cyo kurekura imfungwa zifungiwe muri gereza zitandukanye mbere yo kuva ku butegetsi. Guverinoma ya Tshisekedi yabishyize mu bikorwa, "kugirango igihugu gikomeze."
"Nta muntu n'umwe, rwose ntawe uzakwereka inyandiko yashyizweho umukono na Félix Tshisekedi yemera irekurwa ry'abo bantu bose."
Ku bijyanye no kuba perezida mushya yari afite ububasha bwo guhagarika aya mabwiriza, Peter Kazadi yemeye ko byashobokaga, ariko ko guverinoma "nta nyungu yari ifite mu bikora."
Yagize ati: "Ninde wari uzi ko nibarekura bamwe muri bo, bazasubira mu nyeshyamba?"
Yongeyeho ko Joseph Kabila yashyize umukono ku mategeko menshi manda ye irangiye, amwe muri yo akaba yarasubitswe nyuma, ndetse rimwe na rimwe akanashyira abantu benshi ku mwanya umwe icya rimwe.
Ku bijyanye no kuba hari abanyamuryango ba M23 bari i Kinshasa, uwakurikiranaga ikiganiro yavuze ko umukuru w'igihugu yemeye mu kiganiro n'abanyamakuru, Peter Kazadi yemeje ko Félix Tshisekedi "atigeze abatumira".
Yavuze ko ibi byatewe na Ibalanky, ubu ukiri mu nyeshyamba, bivugwa ko yazanye abayoboke b'uyu mutwe i Kinshasa nyuma yo kubimenyesha Minisitiri w’ubutegetsi bw’igihugu icyo gihe, Gilbert Kankonde. Bivugwa kandi ko Ibalanky yasabye umushinjacyahai mukuru kureka ibirego baregwaga.
Peter Kazadi yagize ati: "Niba nabeshye, aze anyomoze."
Abajijwe ku mezi hafi 14 aba bantu ba M23 bamaze mu murwa mukuru, uyu muyobozi muri UDPS yamaganye ijambo "inyeshyamba."
Yakomeje agira ati: "Muri icyo gihe, ntabwo bari inyeshyamba."
Ku bwe, bari bagiye gusaba gushyirwa mu buzima bw’igihugu, harimo n'umuyobozi w’uyu mutwe (Gen. Makenga), cyane cyane "gusubizwa mu ngabo z’igihugu."
Yabisobanuye agira ati: “Ntabwo twashoboraga kubatera umugongo”.