Polisi yo mu gihugu cya Pologne yakiriye amakuru avuga ku mugambi ushobora kuba uhari wo kwica Minisitiri w’Intebe Donald Tusk na Minisitiri w’Ingabo Wladyslaw Kosiniak-Kamysz nk'uko byatangajwe n'abayobozi.
Mu itangazo ryatanzwe ku mbuga nkoranyambaga kuri iki Cyumweru, umuvugizi wa polisi, Karolina Galecka, yavuze ko Minisiteri y’Ubutegetsi bw’Igihugu yategetse ko "hagira igikorwa kuri iki kibazo".
Galecka yavuze kandi ko polisi, urwego rushinzwe umutekano w’abayobozi bakuru b’igihugu, n’abahagarariye minisiteri bagiranye inama yihutirwa kuri iki Cyumweru yo kuganira kuri iyo ngingo.
Nta yandi makuru arambuye yahise atangazwa kuri uwo mugambi bivugwa ko uhari cyangwa aho waturutse.
Yaba Tusk cyangwa Kosiniak-Kamysz, usanzwe ari na Minisitiri w’Intebe wungirije, nta cyo baratangaza kuri ayo makuru.
Nk’uko bitangazwa n’ibitangazamakuru byo muri icyo gihugu, nyuma y’iyo nama, umuvugizi w’inzego zidasanzwe zishinzwe umutekano, Jacek Dobrzynski, yabwiye abanyamakuru ko inzego zibishinzwe zifata ayo makuru nk’ikintu gikomeye cyane.
Ikigo cy’itangazamakuru cyigenga cya Polsat News cyatangaje amagambo ya Dobrzynski avuga ko hari ingamba zafatiwe muri iyo nama, gusa ntiyatanze ibisobanuro birambuye.
Radiyo yigenga ya Radio Zet yatangaje ko polisi yakiriye ubutumwa bwa email burimo amakuru yerekeye uwo mugambi.
Inkuru yanditswe na: Denis Nsengiyumva
Umunyamakuru wa BWIZA.COM wanditse inkuru 11,310.