Umuyobozi w’itsinda ry’abashinzwe ibiganiro ku ruhande rw’u Burusiya, Vladimir Medinsky, yatangaje ko hari ibibazo bitandukanye byumvikanweho, birimo guhana imfungwa kandi ko hazabaho ibindi biganiro.
Medinsky yabwiye televiziyo ya Leta y’u Burusiya ko u Burusiya na Ukraine bumvikaniye i Abu Dhabi, muri Leta Zunze Ubumwe z'Abarabu (UAE), ku gukora igikorwa cyagutse cyo guhana imfungwa.
"Twumvikanye ku buryo bushya bwo guhana imfungwa ku rwego runini," ibi Medinsky yabibwiye abanyamakuru, yongeraho ko ibisobanuro birambuye bizatangazwa nyuma.
Guhana imfungwa n'ubundi ni kimwe mu byo impande zombi zabashije kumvikanaho mu biganiro byabaye mbere nk'uko inkuru dukesha DW ivuga.
Medinsky yavuze ku bijyanye n’ibyo biganiro agira ati: "Twaganiriye n’uruhande rwa Amerika kuri iyi ngingo; hari aho twahuje imyumvire, naho ahandi ntitwabasha kumvikana. Kandi birumvikana ko ibi biganiro bizakomeza. Isi ikeneye uburyo bushya, bugezweho kandi buvuguruye bwo gucunga umutekano, uburyo bunoze kandi butabangamira ibihugu bimwe na bimwe."
Ibiganiro byayobowe na Jared Kushner , umukwe wa Perezida wa Leta Zunze Ubumwe za Amerika Donald Trump, hamwe n’intumwa Steve Witkoff. Nk’uko Kushner yabitangaje, bazerekeza i Moscou ku wa Kane, hanyuma bahure na Perezida wa Ukraine, Volodymyr Zelenskyy, i Dublin.
Intumwa z'u Burusiya, Ukraine na Amerika zahuriye i Abu Dhabi kuva kuwa Kabiri mu rwego rwo kurangiza amakimbirane akomeye cyane abaye mu Burayi kuva Intambara ya Kabiri y'Isi Yose yarangira. Abahagarariye EU na bo bakurikiraniye hafi ibiganiro.
Iyi nama ibaye mu gihe intambara y'u Burusiya na Ukraine imaze amezi 56, ikaba imaze guhitana ibihumbi n'ibihumbi kandi amamiliyoni bakaba baravanwe mu byabo.