Perezida wa Leta Zunze Ubumwe za Amerika, Donald Trump, yatangaje ko aramutse ahanganye na Barack Obama mu matora ya Perezida, yamutsinda ku buryo bworoshye, amushinja kuba umukuru w’igihugu ukabirizwa.
Ibi Trump yabivugiye mu kiganiro yagiranye n’umunyamakuru Stephen A. Smith muri White House, aho baganiriye ku ngingo zitandukanye zirimo n’intsinzwi z’Abarepubulikani mu matora yo hagati ya manda yabaye mu 2026.
Abajijwe uko yabona amahirwe ye aramutse ahanganye na Obama mu matora, Trump yavuze ko yizeye intsinzi, ashingira ku majwi menshi avuga ko yagiye abona mu matora no ku mateka y’amajwi menshi yegukanye muri Leta zikomeye nka Texas na Florida.
Yagize ati: “Ntekereza ko namutsinda ku buryo bworoshye. Ntekereza ko Obama akabirizwa.”
Trump yanenze imiyoborere ya Obama, avuga ko atamufata nk’umukuru w’igihugu mwiza, ahubwo ko yari umuntu watandukanyaga Abanyamerika. Yavuze ko we atandukanye na Obama kuko ahuza abantu binyuze mu ntsinzi bahuriraho.