Umuhanzi Bruno Kiggundu uzwi nka Bruno K ari guterana amagambo n'umunyamideli w'Umunyarwanda Kantengwa Judith Bitature Heard, uzwi nka Judith Heard bapfa ko yashinjwe urupfu rwa Gogo (Musabyimana Gloriose) yari umuhanzi wamamaye mu ndirimbo zo kuramya no guhimbaza Imana ndetse n'umuntu w'icyamamare ku mbuga nkoranyambaga mu Rwanda.
Uku guterana amagambo kw'aba bombi kwaturutse ku kuba Bruno K avuga ko Judith Heard yamushinje cyangwa yabwiye abantu ko ari we wagize uruhare mu rupfu rwa Gogo.
Mu kiganiro na Canary Mugume, Bruno K ati " Judith Heard yaranyibasiye ngo ninjye wishe Gogo."
Bruno avuga ko ibyo byamubabaje cyane kuko yari inshuti ya Gogo kandi yari yaragiranye na we ibikorwa mbere y’urupfu rwe.
Kantengwa mu gusubiza, ati " Aba bantu narabirengagije sinita ku byo bavuga ariko mu biganiro byabo izina ryanjye ntiribava ku rurimi."
Heard yavuze ko igihe amakimbirane yatangiraga yirinze gusubiza Bruno K, ariko ko atumva impamvu akomeje kumuvugaho. Yavuze ko yakomeje ubuzima bwe kandi ko amwifuriza amahoro.
Gogo yitabye Imana mu ijoro ryo ku wa 3 Nzeri 2025 aguye muri Uganda aho yariagiye mu ivugabutumwa n'ibikorwa byo kwamamaza. Byavuzwe ko yazize uburwayi.
Yamenyekanye cyane mu ndirimbo "Blood of Jesus" (cyangwa "Everyday, I Need Blood of Jesus") yaciye ibintu kuri interineti, ndetse no ku magambo ye yihariye y'icyongereza nka "I going" na "Guud bayi".