Ihuriro ry’ingabo zirwanira ubutegetsi bwa Kinshasa zazindutse zigaba ibitero bikaze mu bice bituwe cyane bitandukanye kuva mu turere twa Minembwe na Walungu muri Kivu y’Amajyepfo ndetse no muri Masisi muri Kivu y’Amajyaruguru, hakoreshejwe indege zitagira abapilote.
Itangazo ryashyizwe ahagaragara na FRN rivuga ko “Ku wa Gatanu, itariki ya 6 Ugushyingo 2026, ingabo zishyize hamwe z’ubutegetsi bwa Kinshasa, zigizwe na FARDC, FDLR, imitwe ya Mai-Mai, abacanshuro, hamwe n’Ingabo z’u Burundi (FDNB), zakajije ibitero byazo ku duce dutuwe cyane, zigamije by’umwihariko kwibasira abasivili ku mirongo itandukanye y’urugamba.
Iri tangazo rivuga ko ku isaha ya saa kumi n’imwe za mu gitondo (5:00 AM): Izi ngabo zifatanyije zagabye ibitero zikoresheje indege zitagira abapilote (drones) z’intambara ku duce twa Rugomero na Nyarurango, kuri axe ya Rugezi muri ako karere ka Minembwe.
Ku isaha ya saa kumi n’ebyiri za mu gitondo (6:00 AM): izo ngabo zakajije ibitero byo kurasa ibisasu biremereye ku duce twa Mukoko, Nyaruhinga, na Nyamabuguma, muri ako karere ka Minembwe nk’uko itangazo rikomeza rivuga.
Ni mu gihe ku isaha ya saa kumi n’ebyiri na mirongo ine za mu gitondo (6:40 AM): Hagabwe ibitero icyarimwe ku duce twa Kasika na Chulwe, muri Teritwari ya Walungu, naho saa mbiri za mu gitondo (8:00 AM), izi ngabo zitangira kurasa ibisasu biremereye cyane ku duce twa Mahanga na Buhimba, muri Teritwari ya Masisi.
Kugeza ubwo aya makuru yatangwaga, ibitero byari bigikomeje, kandi Ingabo za FRN zahagurukiye kurinda abaturage no kubungabunga ubuzima bw’abantu bugarijwe n’ibi bitero nk’uko itangazo risoza rivuga.