Igisirikare cy'u Burundi (FDNB), cyemeje ko hari abasirikare babiri bacyo bafungiye i Baraka muri Repubulika Iharanira Demokarasi ya Congo, nyuma yo gutabwa muri yombi n'ingabo z'icyo gihugu.
Byemejwe n'umuvugizi wa FDNB, Général de Brigade Gaspard Baratuza, ubwo kuri uyu Kabiri tariki ya 29 Nzeri 2026 yagiranaga ikiganiro n’abanyamakuru.
Baratuza wasubizaga ikibazo cyabajijwe ku makuru yavugaga ko abo basirikare b’Abarundi bafungiye i Kinshasa, yasobanuye ko abo basirikare babiri, Maj. Nitunga Jérémie na Capt Kanjori Félicien batawe muri yombi na Leta ya RDC tariki ya 21 Kanama 2026.
Yavuze ko bafungiye i Baraka, aho bafatiwe nyuma yo gusanganwa telefoni, bigakekwa ko bashobora kuba barakoreshwaga "mu bikorwa bidakwiye cyangwa mu gutanga amakuru runaka, kuko nta muntu wari wabatumye kuhagera".
Baratuza yemeje kandi ko abo basirikare bafungiye ku cyicaro gikuru cy’Ingabo za FARDC i Baraka, aho bari bakikorwaho iperereza kugira ngo hamenyekane neza ibyo bakurikiranweho.
Ifatwa ryabo ryabaye nyuma gato y’igitero cya drone cyagabwe muri Santere ya Fizi mu ijoro ryo ku wa 18 rishyira uwa 19 Kanama 2026.
Icyo gitero bikekwa ko cyari kigambiriye Umugaba wungirije w’Ingabo z’u Burundi zirwanira ku butaka, Gen Maj Elie Ndizigiye, uzwi nka Muzinga, gusa yaje kukirokoka.
Ifungwa ry’abo bofisiye b’u Burundi rije mu gihe hari amakuru amaze igihe agaragaza urwikekwe hagati y’imitwe y’ingabo ifatanya mu kurwanya AFC/M23 n’umutwe wa MRDP-Twirwaneho.
U Burundi bumaze igihe bufite abasirikare muri RDC mu rwego rwo gufasha Leta ya Kinshasa mu bikorwa byo guhangana n’imitwe irimo AFC/M23.
Icyakora, ifatwa ry’abo basirikare babiri ryagaragaje ibibazo bishobora kuba biri mu mikoranire y’imitwe y’ingabo iri ku ruhande rumwe mu mirwano, cyane cyane mu bice bya Kivu y’Amajyepfo.