Bwiza

Gen. Muhoozi yajyanwe mu nkiko n’abanyamategeko bo muri Uganda

Amakuru•
Denis Nsengiyumva
By Denis Nsengiyumva
•Kuwa Kane, 19 Ugushyingo 2026 saa 11:43
Gen. Muhoozi yajyanwe mu nkiko n’abanyamategeko bo muri Uganda

Ishyirahamwe ry’Abanyamategeko muri Uganda (Uganda Law Society - ULS) ryareze Umugaba Mukuru w’Ingabo, General Muhoozi Kainerugaba, Umugenzuzi Mukuru wa Polisi, n’izindi nzego z’umutekano, risaba kubahatira kugaragaza Abagande batatu baburiwe irengero.

Nk’uko ikinyamakuru Daily Monitor kibitangaza, ULS yatanze ikirego mu rukiko kuri uyu wa Kane, itariki 19 Ugushyingo 2026, isaba ko hafatwa icyemezo gitegeka abayobozi b’igisirikare na polisi kugaragaza abo bantu, bivugwa ko bashimuswe n’abashinzwe umutekano batambaye imyambaro y’akazi no gutangaza aho baherereye.

Urubanza rureba abagabo batatu baburiwe irengero hagati y’itariki ya 13 na 14 Ugushyingo 2026.

Abo ni Ronald Leonard Egesa, Umusesenguzi mu by’umutekano wo kuri internet, Umuyobozi Mukuru wa Magezi Harvest, akaba n’impuguke ikomeye ya ULS mu bijyanye n’ikoranabuhanga, bivugwa ko yatawe muri yombi ubwo yari mu kiganiro kuri Akabozi FM.

Undi ni Prosper Julian Ahabwe: wihugura mu by’amategeko, waburiwe irengero ubwo yari agiye gusura umukiriya kuri Sitasiyo ya Polisi ya Jinja Road.

Uwa nyuma ni David Musiri: Impirimbanyi mu bya politiki akaba n’umuyobozi w’abanyeshuri washimuswe nyuma gato yo kugaragara ku rubuga rwa ULS.

Mbere yo gutanga ikirego, ULS yasohoye itangazo, ku itariki ya 15 Ugushyingo, inagirana ikiganiro n'abanyamakuru ku itariki ya 17 Ugushyingo, isaba ko aba bantu batatu barekurwa byihuse. Perezida wa ULS, Isaac Ssemakadde yashinje Gen. Muhoozi n'abantu bafitanye isano n'ihuriro Patriotic League of Uganda (PLU), kwibasira abanenga ubutegetsi, abanyamategeko, n'abatavuga rumwe na we binyuze mu gushimuta no kuvana ku Isi.

Igisubizo cy’igisirikare

Mu ntangiriro z'iki cyumweru, umuvugizi w'ingabo w'agateganyo, Col. Chris Magezi, yashyize ahagaragara itangazo ryitiriwe Gen. Muhoozi, aho uyu muyobozi mukuru w'ingabo yise iri shyirahamwe ry'abanyamategeko muri Uganda kuba “agatsiko k’abanyarwenya”.

Kubera igitutu cy'imbere mu gihugu, ubuyobozi bwa ULS bwari bwatangaje ko bwiteguye gutanga ikirego gitandukanye muri Leta Zunze Ubumwe za Amerika, barega Gen. Muhoozi gukangisha kwica no gutoteza abanyamategeko.

Denis Nsengiyumva

Inkuru yanditswe na: Denis Nsengiyumva

Umunyamakuru wa BWIZA.COM wanditse inkuru 11,310.