Ingabo za Ethiopia ku wa Kane zatangaje ko zishe abarwanyi 272 b’umutwe wa TPLF, mu mirwano ikomeye yongeye kubura mu Majyaruguru y’iki gihugu.
Ethiopia iravuga ko yishe bariya barwanyi, mu gihe impande zombi zatangiye kuvuga ko Ethiopia yongeye kwinjira mu ntambara ikomeye.
Ku wa Kane tariki ya 24 Nzeri 2026, Ingabo za Ethiopia (ENDF) zatangaje ko zishe abarwanyi 272 ba Tigray People’s Liberation Front (TPLF), nyuma y’ibitero byabereye mu gace ka Wollo ya Ruguru ko mu Ntara ya Amhara, ihana imbibi na Tigray.
ENDF yavuze ko nyuma y’uko abarwanyi ba TPLF n’abo bafatanyije bagabye ibitero ku birindiro bya Leta mu bice bitandukanye bya Wollo, ingabo za Leta zagabye igitero cyo kubasubiza inyuma.
Ingabo za Ethiopia zivuga ko uretse abo 272 bishwe, abandi barwanyi 260 ba TPLF bakomeretse, mu gihe hari n’abandi zivuga ko zafashe mpiri. Zivuga kandi ko zangije ibikoresho bya gisirikare by’uyu mutwe.
Icyakora iyi mibare ntiraremezwa n’andi masoko yigenga, ndetse nta mibare yigenga y’abasirikare ba Leta cyangwa abasivili biciwe muri iyi mirwano yahise iboneka.
Iyi mirwano yabaye mu gihe intambara hagati ya Leta ya Ethiopia na TPLF yongeye gufata intera, nyuma y’imyaka hafi ine hatangiye gushyirwa mu bikorwa amasezerano y’amahoro ya Pretoria yo mu 2022 yari yarahagaritse intambara ikomeye yabahuje kuva mu 2020 kugeza mu 2022.
TPLF na yo yemera ko imirwano ikomeye iri kubera mu bice bya Tigray, Amhara na Afar. Visi Perezida wayo, Amanuel Assefa, yabwiye AFP ko ubu Ethiopia iri mu “ntambara yuzuye”, mu gihe impande zombi zishinjanya kuba ari zo zatangije imirwano mishya.
Ibi bibaye nyuma y’uko TPLF n’indi mitwe itandatu yitwaje intwaro batangaje ihuriro ryiswe Ethiopian Peoples’ Forces Alliance for Survival, rigamije kurwanya Leta ya Minisitiri w’Intebe Abiy Ahmed. Muri iri huriro harimo TPLF, Oromo Liberation Army ndetse na Amhara Fano National Movement.
Imirwano kandi yatumye ingendo z’indege zijya muri bimwe mu bice by’amajyaruguru zihagarikwa, mu gihe amakuru mashya agaragaza ko ibikorwa by’intambara biri gukomeza gukwira mu bice bitandukanye.
Umuryango wa Afurika Yunze Ubumwe, Loni n’abandi bafatanyabikorwa mpuzamahanga basabye impande zombi "kugabanya imirwano no gusubira mu biganiro", mu rwego rwo gukumira ko Ethiopia yakongera kwinjira mu ntambara imeze nk’iyabaye hagati ya 2020 na 2022.