Kompanyi y'indege ya Qatar Airways yavanye mu kazi indege zayo za nyuma zo gutwara abagenzi za Airbus A330 inohereza bamwe mu bapilote muri Rwandair mu gihe intambara ya Iran imaze igihe kirekire ihungabanya urwego rw'indege mu Kigobe ndetse bikihutisha ivanwa mu kazi ry'indege zishaje ku Isi, nk'uko abantu babiri bazi iki kibazo babivuga ndetse n'amakuru yasuzumwe na Reuters akabishimangira.
Iki gikorwa ni ikimenyetso giheruka cy'ingaruka zo kwikuba kabiri kw'ibiciro bya lisansi ikoreshwa n'indege kuva intambara yatangira, kandi birarangiza isiganwa ry'amasosiye atwara abantu mu ndege, yo kugarura izishaje mu kazi kugira ngo zihuze n'ingendo nyinshi zakozwe nyuma ya COVID.
Qatar Airways yakodesheje indege enye zo mu bwoko bwa Airbus A330 za Oman Air umwaka ushize, kandi yateganyaga gukomeza kuzikoresha muri uyu mwaka wose wa 2026, icyakora, nk'uko amakuru abivuga, izi ndege ntizigeze zikoreshwa.
Imwe mu ndege zo mu bwoko bwa A330 yaguzwe na RwandAir, kompanyi y’indege y’u Rwanda, mu ntangiriro z’uyu mwaka. Qatar Airways ifitanye umubano w’igihe kirekire n’iyi kompanyi y’indege, kandi amakuru avuga ko itsinda ry’abapilote barimo n’abatarakora ingendo kuva intambara yatangira, boherejwe gukorera RwandAir by’agateganyo.
Aya makuru yerekeye kohereza abo bapilote no gukura mu ngendo zimwe mu ndege za kompanyi, ntiyari yarigeze atangazwa mbere. Umuvugizi wa Qatar Airways yavuze ko ari ibisanzwe kuri iyo kompanyi gusuzuma imiterere y’indege zayo, aho "ikura mu ngendo indege zishaje igashyiramo izindi nshya kandi zikora neza uko bazihawe". Uwo muvugizi yongeyeho ko mu myaka itanu iri imbere, iyo kompanyi iteganya kwakira indege nshya zigera ku 138.
Iyi kompanyi ivuga ko ifite indege za Airbus na Boeing zigizwe n’indege 239 zitwara abagenzi n’izindi 30 zitwara imizigo. Indege zo mu bwoko bwa A330 zari 7% z’izitwara abagenzi zose, kugeza muri Werurwe, nk’uko amakuru y’iyi kompanyi abigaragaza.
Umuvugizi wa Qatar Airways yagize ati: "Itsinda ry’abapilote ba Qatar Airways A330 riri guhabwa amahirwe yo koherezwa igihe gito ku bushake muri RwandAir," yongeraho ko iyi gahunda itanga amahirwe y’ingirakamaro ku bapilote mu gihe ishyigikira ibisabwa mu mikorere y’izo kompanyi zombi z’indege, ariko ntiyavuze igihe bizamara.
Ibiciro bizamuka mu gihe intambara ikomeje
Iyi ntambara yagize ingaruka kuri kompanyi z’indege ku Isi hose, cyane cyane kuri kompanyi zo mu Burasirazuba bwo Hagati nka Dubai na Doha nyuma y’ibitero bya Amerika na Israel ku itariki ya 28 Gashyantare kuri Iran, nubwo ubwinshi bw’indege bwazamutse kugera hafi ku rugero rwa mbere y’intambara.
Mu guhagarika indege za A330 zidakoresha lisansi neza kandi zishaje nk'uko iyi nkuru ivuga, Qatar irimo kugabanya ikiguzi cya lisansi ku ndege. Guhagarika indege bihendutse cyane kuruta kuzikoresha ku giciro cya peteroli kiri hejuru ubu, nk'uko abasesenguzi babivuga. Aha wakwibaza uko Rwandair yo yiteguye kubyaza umusaruro iyi ndege iherutse kwibikaho.
Indege zisigaye za Qatar Airways yakodesheje muri Oman Air ziparitse i Teruel, muri Espagne, cyangwa i Doha, nk'uko amakuru y'abakurikirana urujya n'uruza rw'indege abigaragaza, kandi zakomeje guparikwa muri aya mezi ashize, mu gihe intambara ya Iran ikomeje. Izindi ndege ebyiri za A330 ziparitse i Doha, Qatar ikodesha ku kigo gikodesha indege kitwa Jetran cyo muri Qatar, zizasubizwa mu Ukwakira.