Perezida wa Costa Rica, Laura Fernandez, yirukanye Minisitiri w’Ububanyi n’Amahanga, Manuel Tovar, nyuma yo kwitabira inama y’umutekano y’akarere yari iyobowe na Perezida wa Leta Zunze Ubumwe za Amerika, Donald Trump, atabimumenyesheje, iri rikaba ari ikosa guverinoma yavuze ko ryamubujije kwitabira inama ubwe kandi rigateza ingaruka zikomeye ku nyungu z’igihugu.
Fernandez yavuze ko ari we wagombaga kwitabira inama y’ihuriro rya Trump rirwanya imitwe yabagizi ba nabi rya “Shield of the Americas” i New York. Iri huriro rivuga ko intego yaryo ari ukurwanya icuruzwa ry’ibiyobyabwenge n’ibyaha byateguwe mu karere kose.
Tovar yitabiriye inama “atabanje gutanga integuza cyangwa ngo amenyeshe” perezida, umufatanyabikorwa wa Trump, ko yitabiriye, nk’uko Guverinoma ya Costa Rica yabitangaje. Abaperezida benshi bo muri Amerika y’Epfo bitabiriye inama, yabaye iruhande rw’Inama Rusange y’Umuryango w’Abibumbye i New York.
Abagize ihuriro cumi na batanu basohoye itangazo rihuriweho bavuga ko bemeranyije gufatira imitungo, kwima viza no gukurikirana mu mategeko abanyamuryango n’abashyigikiye imiryango igera kuri 24 y’abagizi ba nabi.
Kuva yagaruka ku butegetsi umwaka ushize, Trump yashyize udutsiko tw'abagizi ba nabi tuzwi nka "cartel" mu rwego rumwe n'abaterabwoba b'abanyamahanga, anategeka ibitero byinshi ku bwato mu birwa bya Karayibe no mu burasirazuba bwa Pasifika, abategetsi ba Amerika bavuga ko bwari butwaye ibiyobyabwenge byerekeza muri Amerika.
Costa Rica, ahantu hari hakunze kugaragara nk'ahantu hatekanye muri Amerika y'Epfo, ubu hari ikibazo cy’ubwiyongere bw'urugomo rushingiye ku biyobyabwenge.
Tovar yirinze kugira icyo avuga ku kwirukanwa kwe, ashimira gusa Fernandez, uri ku butegetsi kuva muri Gicurasi umwaka ushize, kuba yaramwinjije muri guverinoma ye.
Indiana Trejos, wari Minisitiri w’Ubucuruzi mpuzamahanga wa Costa Rica, ubu yagizwe Minisitiri w’Ububanyi n’Amahanga w’agateganyo kandi azatangira akazi ubwo azaba avuye mu butumwa bwe muri UNGA
Kwamamaza (Google Ads)bwiza.com
Inkuru yanditswe na: Denis Nsengiyumva
Umunyamakuru wa BWIZA.COM wanditse inkuru 11,310.