Ku wa 25 Ukwakira 2026, Brazil yakoze icyiciro cya kabiri cy’amatora ya Perezida, cyahuje Perezida Luiz Inácio Lula da Silva, na Flávio Bolsonaro, umusenateri uzwiho ibitekerezo bya politiki by’iburyo, akaba umuhungu wa Jair Bolsonaro wahoze ayobora iki gihugu.
Aya matora yagaragaje ihangana ry’ibitekerezo ku cyerekezo cy’ubukungu, umutekano, imibereho y’abaturage n’umwanya Brazil ikwiye kugira ku ruhando mpuzamahanga.
Abahatanye n’ibyavuye mu matora
Mu cyiciro cya mbere cyabaye ku wa 4 Ukwakira, Flávio Bolsonaro yagize amajwi 47,03%, naho Lula agira 45,16%. Kubera ko nta mukandida wabonye amajwi arenga 50% asabwa kugira ngo atsinde ako kanya, bombi bageze mu cyiciro cya kabiri.
Mu cyiciro cya kabiri, ibyavuye mu matora byemejwe n’urwego rushinzwe amatora byagaragaje ko Lula yatsinze n’amajwi 51,79%, angana na 64.256.232, mu gihe Flávio Bolsonaro yabonye 48,21%, angana na 59.826.041. Itandukaniro ryabaye hafi miliyoni 4,43 z’amajwi.
Muri rusange, abatora bageze ku biro by’itora bari 128,2 miliyoni, bangana na 80,78% by’abari bemerewe gutora.
Ihangana rirenze guhatanira ubutegetsi
Lula yagarutse ku butegetsi nyuma yo gutsinda mu buryo bw’amajwi bwari hafi cyane. Intsinzi ye isobanuye ko Brazil izakomeza kuyoborwa n’ishyaka ry’ibumoso, mu gihe Flávio Bolsonaro yari ahagarariye icyerekezo cy’iburyo cyashakaga guhindura inzira igihugu cyari kirimo.
Ariko kuba amajwi yegeranye bigaragaza ko ihangana rikomeye rya politiki ritarangiye. Ibyo bisaba ko ubutegetsi bwita ku bibazo by’ubukungu, umutekano n’imibereho y’abaturage, mu gihe abatavuga rumwe na bwo bagumana uruhare rukomeye muri politiki y’igihugu.
Ingaruka ku ruhando mpuzamahanga
Brazil ni igihugu gifite ubukungu bukomeye muri Amerika y’Epfo kandi gifite uruhare mu bucuruzi mpuzamahanga, ubuhinzi n’ibiganiro ku miyoborere y’isi.
Gukomeza kuyoborwa na Lula bishobora gutuma Brazil ikomeza gushyira imbere ubwigenge mu gufata ibyemezo no kubaka umubano n’ibihugu bitandukanye, birimo u Bushinwa na Leta Zunze Ubumwe za Amerika.
Ibi ni ingenzi mu gihe inyungu z’ibihugu bikomeye zikomeje guhatanira kugira ijambo muri Amerika y’Epfo.
AP News yatangaje ko nyuma yo gutsindwa, Flávio Bolsonaro yanze kwemera ibyavuye mu matora, asaba ko byateshwa agaciro, avuga ko icyemezo cyo kongera amasaha yo gutora cyateje ikibazo.
Icyakora, urwego rushinzwe amatora rwemeje intsinzi ya Lula. Iyi ntambwe ishobora gukomeza impaka za politiki mu gihe ibibazo by’amatora bigikurikiranwa mu nzira z’amategeko.
Muri macye isesengura rya politike ya Brazil, amatora yicyo gihugu agaragaza ko gutsinda amatora bidahita bikuraho ihangana ryateje ibice bibiri mu baturage cyangwa ngo bikemure ibibazo by’igihugu.
Ikibazo gikomeye kuri Lula ni uguhindura amajwi yamuhaye manda nshya mo ibisubizo bifatika ku baturage, mu gihe Brazil ikomeza kurinda inyungu zayo mu ruhando mpuzamahanga.