Amerika yashyize miliyoni 15$ ku makuru yerekeye abayobozi 3 b'ingabo muri Iran

‎Minisiteri y'Ububanyi n'Amahanga ya Amerika yemeye gutanga miliyoni 15 z'amadolari ku makuru azahungabanya imiyoboro y'imari n'uburyo bwo gutera inkunga Igisirikare kirinda Impinduramatwara ya Iran (IRGC).
‎
Mu itangazo ryerekeye gahunda ya Amerika izwi nka "Rewards for Justice", Leta Zunze Ubumwe za Amerika zatangaje ko zishaka by'umwihariko amakuru ku bikorwa by'imari by'abayobozi bakuru batatu mu ishami rishinzwe indege n'ibyogajuru rya IRGC.
‎
Uwa mbere ni Brigadier General Abdollah Mehrabi, uyobora ishami rishinzwe ubushakashatsi no gukora ibikoresho bya gisirikare rya IRGC. Leta Zunze Ubumwe za Amerika zivuga ko yagize uruhare mu ikorwa rya satelite za gisirikare za Iran n'indege zitagira abapilote (drones).
‎
Uwa kabiri ni Ahmed Ja'farabadi, umukozi mukuru muri iryo shami; ugira uruhare runini mu kuyobora ibikorwa byaryo no gutegura ibikoresho rikenera.
‎
Uwa gatatu ni Ali Asghar Norouzi, uyobora ishami rishinzwe ubukungu rya IRGC. Leta Zunze Ubumwe za Amerika zimushinja kugira uruhare mu kohereza amafaranga n'intwaro ku mitwe yitwaje intwaro ishyigikiwe na Iran muri Aziya yo Hagati.
‎
Iri tangazo rivuga ko igihembo kizahabwa umuntu wese uzatanga amakuru azabangamira ubushobozi bwa IRGC bwo kubona cyangwa gukoresha amafaranga.
‎
Ku wa Kabiri, Minisiteri y’Imari ya Amerika yafatiye ibihano abantu icumi n’imiryango bashinjwa kugurira Minisiteri y'Ingabo ya Iran intwaro n’ibikoresho byo kuzikora. Abantu n’imiryango irebwa n’ibi bihano bafite icyicaro muri Iran, u Bushinwa, Pakistan, Arabia Saoudite, na Turkiya.