Amazi si ya yandi muri UPDF:Hamenyekanye abafashije Bobi Wine kwihisha ubutasi kugeza asohotse igihugu

Amakuru aturuka muri Uganda agaragaza ko Robert Kyagulanyi Ssentamu uzwi nka Bobi Wine umwe mu badacana uwaka na Kampala yabashije gukwepa inzego z'ubutasi za Uganda zamuhize bukware mu gihe cy'amezi abiri yose abifashijwemo n'abasirikare ba Leta (UPDF) arwanya.

Bobi Wine yagiye kwihisha nyuma y’amatora ya Perezida wa Uganda yo ku wa 15 Mutarama 2026, kandi impamvu nyamukuru yavugaga ni uko yari atinya gufatwa cyangwa kugirirwa nabi n’inzego z’umutekano.

Amatora yabaye ku wa 15 Mutarama 2026. Perezida Yoweri Museveni yatangajwe ko yatsinze, ku majwi 71.65%, naho Bobi Wine wa National Unity Platform (NUP) aza ku mwanya wa kabiri n’amajwi 24.72%. Bobi Wine yahakanye ibisubizo, avuga ko byahinduwe kandi ko bidahuye n’amakuru yo ku biro by’itora.

Kuri ubu amakuru ahari ni uko mu gihe Bobi Wine yamaze amezi abiri yihisha inzego zamuhigaga nyuma yo kumubura mu rugo iwe, abarimo Lt. Mabonga Mandonga Herbert wakoraga mu Rwego rw'Ubutasi bwa Gisirikare (CMI) ari we wari umushoferi we.

Bobi Wine yagiye agaragara kenshi yidegembya mu gihugu, hakibazwa uko bimeze mu butasi haba DISO, ISO, CMI n'abandi bananiwe kumuta muri yombi.

Amashusho BWIZA yabonye, Lt. Mabonga yari kumwe na Bobi Wine mu modoka. Yaje kugaragara yasuye ahari imva ya mama we ahitwa Gomba, nyuma yagiye agaragara ahandi henshi. Byaje no kuboneka ko Bobi Wine yagiye afata za Selfie ari mu muhanda, inyuma ye hari abapolisi bacunze z'umutekano.

Bobi Wine ubwo yari amaze gusohoka igihugu yashimiye abapolisi n'abasirikare kuko bamufashije gutoroka. Ibi byafashwe nko kwatsa umuriro kuko birumvikana ko ibi bishoboka ariko ibimenyetso bigenda byigaragaza ko hari abakora mu nzego z'umutekano za Uganda cyane muri UPDF batishimiye ubutegetsi bwa Kaguta Museveni.

Icyo gihe mu kwishongora yagize ati " Ushobora kugira ubutasi ariko wowe utari umuhanga ( You can have intelligence without you being intelligent)."

Birumvikana ko Lt Mabonga atari we wenyine wafashije Bobi Wine kugeza asohotse mu gihugu kuko bigaragara ko atari ikintu umuntu umwe yakwifasha. Ni ingingo yatumye ab' i Nakasero bikanga.