Bwiza

Umushinwa yashimutiwe muri RDC

Amakuru•
Olivier NTANTURO
By Olivier NTANTURO
•Kuwa Kabiri, 17 Ugushyingo 2026 saa 06:15
Umushinwa yashimutiwe muri RDC

Umushinwa ukora mu bucukuzi bw’amabuye y’agaciro yashimuswe, abantu babiri baricwa, undi arakomereka mu gico cyagabwe n’abantu bitwaje intwaro ku muhanda wa Kalemie-Bendera, mu Ntara ya Tanganyika muri Repubulika Iharanira Demokarasi ya Congo (RDC).

Iki gitero cyabaye ku wa Gatandatu tariki ya 14 Ugushyingo 2026, mu bilometero 42 uvuye mu mujyi wa Kalemie.

Umuyobozi w’Akarere ka Kalemie, John Mutombo Kabanga, yabwiye Radio Okapi ko mu bishwe harimo umusirikare w’Ingabo za RDC (FARDC) wari ushinzwe gucungira umutekano uwo Mushinwa n’umukozi w’ikigo cy’ubucukuzi bw’amabuye y’agaciro.

Yavuze ko umushoferi wari utwaye imodoka yarashwe agakomereka, mu gihe uwo Mushinwa yashimuswe akajyanwa n’abagabye igitero mu cyerekezo kitamenyekanye.

Kugeza ku wa Mbere tariki ya 16 Ugushyingo, inzego z’umutekano zari zigikomeje ibikorwa byo gushakisha uwashimuswe no kumenya abakoze icyo gitero.

Ishimutwa rye rije rikurikira ibindi bitero byagiye bigabwa ku Bashinwa bakora mu bucukuzi bw’amabuye y’agaciro muri Tanganyika. Amakuru aturuka i Kalemie avuga ko bamwe mu bashimuswe muri ibyo bitero barekuwe nyuma yo gutanga amafaranga y’incungu.

Ubuyobozi bw’ako karere bwari bwaratangaje ko bugiye kongera ingamba z’umutekano kuri uwo muhanda kugira ngo burinde abashoramari n’abandi banyamahanga bahakorera.

Olivier NTANTURO

Inkuru yanditswe na: Olivier NTANTURO

Umunyamakuru wa BWIZA.COM wanditse inkuru 2,803.