Umugabo watwitse Korowani (Quran) yishwe arashwe

Salwan Momika, umugabo w’imyaka 38 wavuzwe cyane nyuma yo gutwika Korowani, yarashwe arapfa muri Suwede, nk’uko byatangajwe n’ibitangazamakuru byo muri icyo gihugu.

Uyu Munya-Irak wari utuye muri Suwede yarashwe ku mugoroba wo ku wa Gatatu mu nzu ye i Södertälje, hafi ya Stockholm.

Polisi yatangaje ko abantu batanu batawe muri yombi nyuma y'aho uyu mugabo uri mu kigero cy’imyaka 40 arasiwe.

Momika yari azwi cyane kubera imyigaragambyo yakoze mu 2023, aho yatwitse Korowani hafi y’imisigiti, bikaza guteza umwuka mubi n’imyigaragambyo mu bihugu byinshi byiganjemo abayisilamu.

Mu kwezi kwa Kanama 2023, Momika yari yarezwe hamwe n’undi muntu icyaha cyo "gusebya itsinda ry’abantu" inshuro enye.

Urukiko rwa Stockholm rwagombaga gutanga umwanzuro kuri urwo rubanza ku wa Kane, ariko rutangaza ko byasubitswe nyuma yo kwemeza urupfu rwe.

Suwede yari yemereye Momika gutwika Korowani hashingiwe ku mategeko y’ubwisanzure bw’ibitekerezo, ariko nyuma bwatangaje ko bugiye kwiga uko bwakumira imyigaragambyo nk’iyo mu bihe bimwe na bimwe.