Umoja wa Afrika, kupitia Mwenyekiti wa Tume yake, Mahmoud Ali Youssouf, umekaribisha makubaliano ya kuleta mashindano ya magari ya Formula 1 nchini Rwanda, ukieleza kuwa ni hatua muhimu katika maendeleo ya michezo barani Afrika na ishara ya kuongezeka kwa uwezo wa bara hilo kuandaa mashindano makubwa ya kimataifa ya kiwango cha juu.
Katika taarifa iliyotolewa Oktoba 23, 2026, jijini Addis Ababa, Ethiopia, Youssouf alisema kuwa makubaliano hayo ni hatua muhimu katika kuendeleza michezo barani Afrika na yanaonesha uwezo unaoongezeka wa bara hilo wa kuandaa mashindano makubwa ya kimataifa.
“Tume ya Umoja wa Afrika (AUC), kupitia Mwenyekiti wake, Mheshimiwa Mahmoud Ali Youssouf, imekaribisha makubaliano ya kuleta mashindano ya Formula 1 nchini Rwanda, ikieleza kuwa ni hatua muhimu kwa michezo ya Afrika na ishara ya kuongezeka kwa uwezo wa bara hilo kuandaa mashindano ya kimataifa ya kiwango cha juu,” taarifa hiyo inasema.
Youssouf ameipongeza Serikali ya Rwanda kwa mafanikio hayo, akisisitiza umuhimu wa mashindano makubwa ya kimataifa katika kuongeza mwonekano wa Afrika duniani, kuvutia uwekezaji, kukuza utalii na kuendeleza ujuzi wa wataalamu wa ndani.
Pia alisisitiza fursa ambazo mashindano ya aina hiyo yanazalisha kwa vijana wa bara hilo.
Mwenyekiti huyo wa Tume ya Umoja wa Afrika alieleza zaidi kuwa michezo ni kichocheo cha ukuaji endelevu wa uchumi, uundaji wa ajira, uwezeshaji wa vijana na ushirikiano wa kikanda.
Alisisitiza umuhimu wa kuimarisha ushiriki wa Afrika katika uchumi wa michezo duniani, kuendeleza ushirikiano kati ya sekta ya umma na sekta binafsi, na kutumia kikamilifu uwezo wa bara hilo katika ubunifu na ujasiriamali.
Kwa mujibu wa taarifa hiyo, mpango huo unaendana na matarajio ya Ajenda ya Umoja wa Afrika ya mwaka 2063, inayolenga kujenga Afrika iliyoungana, yenye ustawi na amani, inayoendeshwa na wananchi wake na kushiriki kikamilifu katika masuala ya kimataifa.
Youssouf amehimiza kuendelea kwa ushirikiano kati ya nchi wanachama wa Umoja wa Afrika, sekta binafsi na wadau husika ili kutumia uwezo wa michezo kuleta mabadiliko na kuchochea maendeleo ya Afrika, ushirikiano wa kikanda na kuimarisha nafasi ya bara hilo katika medani ya kimataifa.