Ambasade ya Repubulika ya Uganda i Berlin yagiranye amasezerano y’ubufatanye bw'imyaka itatu n'ikipe y'umupira w'amaguru ya VfB Einheit zu Pankow, yo mu Budage, mu rwego rwo kwamamaza Uganda nk'ahantu hakurura ba mukerarugendo, hakurikijwe ukuntu umupira w'amaguru ukunzwe cyane, kugira ngo wongere kumenyekanisha isura y'igihugu ku rwego mpuzamahanga no gushimangira umubano hagati y'abantu n'abandi.
Ubu bufatanye bwashyizweho umukono binyuze mu gusinya amasezerano y'ubwumvikane (MoU) hagati ya Ambasaderi Danny Ssozi, Charge d’Affaires w’agateganyo wa Ambasade ya Uganda i Berlin, ari kumwe na Madamu Jessica Namuddu, Umunyamabanga wa Kabiri, n'abahagarariye ikipe ya VfB Einheit zu Pankow, mu gikorwa cyabereye mu Karere ka Pankow i Berlin.
Ikipe ya VfB Einheit zu Pankow ibarizwa muri Bezirksliga Berlin (Tier 8) ukurikije sisitemu y’umupira wamaguru mu Budage.
Bezirksliga (mu Cyongereza: County League) ni icyiciro cyo ku rwego rwo hagati mu marushanwa y’abakinnyi batabigize umwuga, kikaba kiri ku ntera ya 7, iya 8 cyangwa iya 9 muri gahunda y’amarushanwa y’umupira w’amaguru mu Budage.
Muri aya masezerano, ikirango cy’ubukerarugendo bwa Uganda, “Explore Uganda – The Pearl of Africa,” kizagaragara ku myambaro y’ikipe nkuru y’abagabo ndetse n’ikipe y’abakiri bato yitwa G2.
Byitezwe ko iki kirango kizagaragaza urwego rw’ubukererugendo muri Uganda imbere y’abafana b’umupira w’amaguru, abaturage bo muri ako gace, ndetse n’abandi bantu benshi mu Budage, bityo bikazafungura amahirwe mashya yo kumenyekanisha Uganda no gutuma abantu bagira amatsiko yo kuyisura.
Ubu bufatanye, nk’uko bitangazwa na Ambasade ya Uganda, bugaragaza ko igihugu gikomeje kugira ubushake bwo gushyiraho uburyo bushya kandi bugamije kwamamaza ahantu nyaburanga, hakoreshejwe siporo nk'urubuga rw'ingenzi rwo guteza imbere ubukerarugendo, n’ubutwererane mu by’umuco.
Uretse kwamamaza ahantu nyaburanga, ubufatanye butanga urubuga rwo gukomeza umubano wa Uganda n'u Budage no gusangira inyungu za siporo. Binatanga amahirwe yo kugirana imikoranire myiza hagati y'abaturage ba Uganda n'Abadage, kandi bikagaragaza uburyo siporo ishobora gutanga umusanzu mu bijyanye n'umuco no gukorera hamwe bya hafi hagati y'ibihugu byombi.
Amasezerano yahuriranye n'umukino wa ‘delby ya Pankow’ hagati ya VfB Einheit zu Pankow na FC Concordia Wilhelmsruh. Aya makipe yashinzwe mu 1893 na 1895, yombi afite imyaka irenga ijana y'amateka mu mupira w'amaguru mu Karere ka Pankow.
Ambasade yagaragaje icyizere cy'uko ubufatanye bw'imyaka itatu buzatanga isura ihamye ku kirango cy'ubukerarugendo cya Uganda, mu gihe bubaka umubano ufatika n'abakunzi b'umupira w'amaguru mu Budage ndetse n'abaturage muri rusange.
Iki gikorwa kiri mu bikorwa byagutse bya Uganda byo kuvugurura uburyo bwo guteza imbere ubukerarugendo, burimo kurushaho kugaragara ku masoko mpuzamahanga no gushyira igihugu mu mwanya w’ahantu heza ho gukorera ubukerarugendo bushingiye ku bidukikije, kureba inyamaswa zo mu gasozi, n’umuco n'umurage.