Umugaba Mukuru w’Ingabo za Uganda, Gen Muhoozi Kainerugaba yagize Brig. Gen. Oscar Munanura, Umuyobozi mushya ushinzwe ubutasi n’umutekano mu gisirikare (CDIS), asimbuye Maj Gen Richard Otto mu mavugurura mashya yakozwe mu buyobozi bushinzwe ubutasi bwa gisirikare, mu gihe havugwaga ko uwahoze yungirije umugaba w’ingabo, Lt Gen Peter Elwelu, yashinze umutwe w’inyeshyamba.
Mu gitondo cyo kuri uyu wa Kabiri, umwe mu bazi iki kibazo yabwiye ChimpReports ati: "Muri izo mpinduka, Munanura yazamuwe ku mwanya wa Maj. Gen. w'agateganyo kandi agirwa umuyobozi w'urwego rukomeye rushinzwe ubutasi n’umutekano mu gisirikare, mu gihe Otto yasabwe kugana ishami rishinzwe abakozi kugira ngo yoherezwe ahandi."
Iri shyirwaho, ritaratangazwa ku mugaragaro, rije mu gihe Gen Muhoozi avuga ko abashinzwe umutekano bataye muri yombi abasirikare barenga 20 bahoze bakorana na Elwelu.
Mu magambo ye Muhoozi yagize ati: "Twafashe abasirikare 20 bahoze ari abasirikare ba Elweru. Barimo gukorana natwe neza".
Yongeyeho ati: “Elweru agomba kwitanga vuba kugira ngo arokore ubuzima bwe.”
Muhoozi yatangaje kandi ko Elwelu yambuwe amapeti ya gisirikare.
Yakomeje agira ati: "Umugambanyi Peter Elweru yambuwe amapeti ye. Yamanuwe ku ipeti rya private."
Gen. Muhoozi yakomeje agira ati: “Reka isi yose imenye ko twe (Uganda) dushaka gukomeza kuba ba nyir'inzu yacu.”
Aya magambo aragaragaza ubwiyongere bukabije mu ihangana hagati y’ubuyobozi bwa gisirikare na Elwelu, wabaye mu myanya imwe ikomeye y’ubuyobozi mu Gisirikare cya Uganda (UPDF).