Inzego z’ubuzima muri Repubulika ya Demokarasi ya Congo (DRC), zemeje ko intara ya Ubangi y'amajyaruguru (Nord-Ubangi), ihana imbibi na Centrafrique, yabaye intara ya munani icyorezo cya Ebola cyagezemo.
Raporo nshya kuri iki cyorezo yasohotse ku itariki ya 18 y’uku kwezi kw'Ukwakira (10) igaragaza ko iki cyorezo cyageze mu karere k'ubuzima ka Wapinda muri Nord-Ubangi, ubu uturere tw'ubuzima 66 ni two Ebola imaze kugeramo mu ntara umunani.
Iki cyorezo cyatangajwe bwa mbere ku itariki ya 15 Gicurasi (5) uyu mwaka. Abemejwe ko banduye bose hamwe bamaze kugera ku 9,455 naho abapfuye ni 4,561, bivuze ko iyi Ebola yica ku gipimo cya 48.2%.
Nubwo Ebola irimo gukwira mu turere dushya, hari ibimenyetso bitanga icyizere by'abarwayi bakize. Umubare w’abarwayi bose hamwe bakize warenze 2500 ugera ku 2530, nyuma yo gusezererwa mu bitaro guherutse kuba mu ntara za Ituri na Kivu ya Ruguru nk'uko inkuru ya BBC ivuga.
Abarwayi 925 baracyari mu kato cyangwa mu bitaro, mu gihe amatsinda y'abakozi bo mu rwego rw'ubuzima arimo kureba uko yabyitwaramo kubera ikibazo cy'ibitanda byo kwa muganga birimo kuba bicye bitewe n'ubwinshi bw'abarwayi mu turere twibasiwe cyane n'iki cyorezo.
Ibikorwa byo gufasha abantu biracyakomeje mu mpande zose, harimo no gukangurira abaturage kwirinda no gukingira abantu ngo hakumirwe ikwirakwira ry’iki cyorezo. Inzego z’ubuzima zitangaza ko igipimo rusange cyo kumenya abagize aho bahurira n'abanduye kiri kuri 80% ku rwego rw'igihugu, kikaba kikiri munsi y'intego ya 95% bihaye.