Mpilo Moyo, raia wa Zimbabwe, amesema anaona aibu anapoilinganisha nchi yake na Rwanda, akisema kuwa licha ya Zimbabwe kuwa na rasilimali nyingi za asili, imeshindwa kuzitumia ipasavyo kufikia maendeleo.
Katika ujumbe aliouchapisha kwenye mitandao ya kijamii, Moyo alisema Zimbabwe ina dhahabu, platinamu, almasi, ardhi yenye rutuba na wananchi wenye elimu, lakini ufisadi, ubadhirifu wa mali ya umma na matumizi mabaya ya madaraka vimekwamisha maendeleo ya nchi hiyo.
Alisema Rwanda imepiga hatua kubwa licha ya kuwa na rasilimali chache, akitaja umoja wa wananchi baada ya mauaji ya kimbari dhidi ya Watutsi mwaka 1994, nidhamu na maamuzi ya uongozi kama baadhi ya mambo yaliyochangia maendeleo yake.
Moyo alitaja miundombinu na miradi mbalimbali, ikiwemo Kigali Convention Centre, Kigali Arena, Uwanja wa Amahoro na kuandaa michuano ya dunia ya mbio za baiskeli za UCI. Pia alizungumzia mipango ya Rwanda kuandaa mashindano ya Formula 1, akisema hatua hizo zinaonyesha uwezo wa nchi hiyo kujiendeleza.
Alimpongeza Rais Paul Kagame na wananchi wa Rwanda kwa nidhamu, usafi na maono yao, akisema Zimbabwe inapaswa kujifunza kutoka Rwanda kwamba maendeleo hayategemei wingi wa rasilimali pekee, bali pia uongozi unaowajibika na matumizi bora ya rasilimali zilizopo.
Moyo alisema hana wivu na Rwanda, bali anatamani kuona Zimbabwe ikipiga hatua kama hiyo na Harare ikawa jiji linalofanana na Kigali.
Ujumbe wake ulizua maoni tofauti mitandaoni. Baadhi ya watumiaji waliunga mkono hoja zake, huku wengine wakisema ameisifu Rwanda kupita kiasi na kutoa taarifa zisizo sahihi, hasa kuhusu rasilimali za madini.