FDLR iri guhabwa n’Ababiligi imyitozo ya gikomando hafi ya Kindu

Abarwanyi b'umutwe wa FDLR bari guhabwa imyitozo yihariye ya gikomando n'Ingabo z'u Bubiligi, mu gihe indi batayo igizwe n'abarwanyi 1,200 baheruka gusoza imyitozo iri kurwanira na AFC/M23 mu bice bya Teritwari ya Walikale.

Abo barwanyi bashya bari gutorezwa mu kigo cya gisirikare cya Camp-Lwama giherereye mu ntara ya Maniema, hafi y’Umujyi wa Kindu; nk'uko amakuru BWIZA ikura imbere mu nzego z'iperereza za FARDC abivuga.

Uwahaye iki gitangazamakuru amakuru yavuze ko bariya barwanyi ba FDLR bari guhererwa "imyitozo ya gi-Hiboux" muri kiriya kigo cya gisirikare giherereye mu bilometero nka 30 uvuye i Kindu.

Ati: “Amakuru mfite y’ukuri ni uko aba FDLR bari Camp-Lwama. Camp-Lwama ni muri Maniema, mu bilometero 30 uvuye i Kindu. Abo ba FDLR bari guhabwa imyitozo yihariye ya gi-Hiboux.”

Hiboux ni umwe mu mitwe y'ingabo zidasanzwe za RDC.

BWIZA yamenye ko mbere y'uko bariya barwanyi bajya gutorezwa hariya hantu babanje kuvanwa mu kigo cya gisirikare cya Mura giherereye mu ntara ya Haut-Katanga, banyuzwa i Kisangani mu ntara ya Tshopo, aho bamaze igihe bahabwa imyitozo mbere yo koherezwa i Kindu.

Ababiligi bari inyuma y’imyitozo

Imboni ya BWIZA yavuze ko ikigo cya gisirikare cya Lwama gisanzwe ari icy'Ababiligi, ndetse ko ari na bo bari gutoza bariya barwanyi ba FDLR.

Iti: "I Kindu hari ikigo cya gisirikare cy'Ababiligi cya Lwama. Umutwe w'ingabo zacu zo muri Brigade ya 32 ni wo ushinzwe icyo kigo. Bari (FDLR) kuhakorera imyitozo, ni imyitozo y'Ababiligi. Ababiligi ni bo baba muri icyo kigo.

FDLR 1,200 zamaze koherezwa muri Walikale

Uyu musirikare yavuze kandi ko abarwanyi ba FDLR bagera ku 1,200 bamaze koherezwa ku rugamba mu bice bitandukanye bya Teritwari ya Walikale, aho bari gufasha FARDC mu mirwano yayo na AFC/M23.

Yavuze ko abo barwanyi bagize batayo yitwa “RAD”, amagambo ahinnye y’Igifaransa ya “Réserve Armée pour la Défense”.

Ati: “Abandi ba FDLR ubu tuvugana bari ku rugamba. Iyo batayo ya RAD ni batayo y’abantu 1,200 ba FDLR. Abo 1,200 ni bo bari kurwana mu bice bya Walikale. Bayita Batayo RAD, Réserve Armée pour la Défense.”

Uyu musirikare yavuze ko abo barwanyi bari mu bice birimo Ngola na Humura, ndetse ko ari bo bagize “advance party” mu bice FARDC n’abafatanyabikorwa bayo bagiye bambura AFC/M23.

“Advance party” ni itsinda ry’abasirikare ribanziriza umutwe munini w’ingabo. Rishobora koherezwa imbere kugira ngo ribanze gusuzuma no gutegura aho izindi ngabo zigiye kugera, harimo gutegura imyanya, inzira n’ibindi bikorwa bya gisirikare bikenewe mbere y’uko umutwe munini uhagera.

Imikoranire ya FARDC na FDLR imaze igihe

Imikoranire hagati ya FARDC na FDLR si amakuru mashya. Yagiye igaragara muri raporo zitandukanye, harimo iza Komisiyo y’Impuguke z’Umuryango w’Abibumbye kuri Repubulika Iharanira Demokarasi ya Congo.

Izo raporo zagiye zigaragaza ko FDLR yakoranye n’ingabo za FARDC n’imitwe yitwaje intwaro ishyigikiye ubutegetsi bwa Kinshasa mu mirwano yo kurwanya AFC/M23.

Amakuru avuga ko ubutegetsi bwa Perezida Félix Tshisekedi bwagiye busaba FDLR gufasha FARDC guhangana na AFC/M23, mu gihe u Rwanda rushinja Kinshasa gukomeza gukorana n’uwo mutwe ushinjwa uruhare muri Jenoside yakorewe Abatutsi mu Rwanda.

FARDC kandi yashinjwe inshuro nyinshi guha FDLR intwaro, amafaranga n’ubundi bufasha kugira ngo yitabire imirwano yo mu burasirazuba bwa RDC.

Kinshasa ikomeje gukorana n'uriya mutwe mu gihe imaze igihe ivuga ko yiyemeje gusenya no kwambura intwaro FDLR.

Nyuma y’amasezerano y’amahoro ya Washington yasinywe hagati ya RDC n’u Rwanda, Kinshasa yatangaje ko iri gushyira mu bikorwa gahunda yo kwambura FDLR intwaro, kuyikusanyiriza hamwe no kuyisubiza mu Rwanda.

Mu kwezi gushize, ubutegetsi bwa RDC bwatangaje ko bwagiranye amasezerano na FDLR agamije kuyambura intwaro, guhuriza hamwe abarwanyi bayo no gutegura uburyo basubizwa mu Rwanda.

Kugeza ubu, ariko, nta murwanyi wa FDLR Kinshasa iragaragaza ku mugaragaro ko yamaze kwambura intwaro no gushyira muri iyo gahunda.

U Rwanda rwamaganye iyo gahunda, ruvuga ko ari amayeri ya Kinshasa yo gukomeza gukorana na FDLR mu gihe yari yiyemeje kuyisenya no kuyambura ubushobozi bwa gisirikare.