Ishyirahamwe ry’Umupira w’Amaguru muri Portugal ryahagaritse Cristiano Ronaldo iminsi 30, rinamuca amayero 255, nyuma y’amakimbirane yagiranye n’umutoza Jorge Jesus.
Cristiano Ronaldo, kapiteni w’ikipe y’igihugu ya Portugal, yahagaritswe iminsi 30 n’urwego rushinzwe imyitwarire mu Ishyirahamwe ry’Umupira w’Amaguru muri Portugal (FPF), nyuma yo kuva mu mwiherero w’ikipe y’igihugu mbere y’umukino wa UEFA Nations League.
Mu itangazo ryasohotse ku wa Mbere, tariki ya 19 Ukwakira 2026, uru rwego rwavuze ko rwemeje ibirego byaregwaga uyu rutahizamu w’imyaka 41, rumuca amayero 255, ahwanye 420,884 Frw.
Ronaldo yavuye aho ikipe y’igihugu ya Portugal yari ikambitse i Copenhagen, muri Denmark, mbere y’umukino yagombaga kuyihuza na Denmark muri uku kwezi, nyuma y’amakimbirane yari afitanye n’umutoza Jorge Jesus ku bijyanye n’umwanya we mu ikipe.
Ibi byabaye nyuma y’uko Ronaldo atakinnye umukino Portugal yatsinzemo Norway, aho yari yasigaye ku ntebe y’abasimbura.