Polisi ya Uganda yatangaje ko umugabo umwe yishwe nyuma y’uko itsinda ry’abantu bagera kuri batandatu ryagabye igitero kuri sitasiyo ya Polisi ya Bugoye, mu Karere ka Kasese, bagerageza kwiba imbunda umupolisi wari ku kazi.
Ibyo byabaye mu rukerera rwo ku wa Kane tariki ya 1 Ukwakira 2026, ahagana saa munani z’ijoro, mu gace ka Bugoye.
Polisi ivuga ko abo bagabo bari bitwaje imipanga bateye inzu umupolisi yari arinze, bagamije kumwambura imbunda yari afite.
Uwo mupolisi ngo yarwanije icyo gitero, maze arasa umwe mu bagabye igitero akomereka ku kuguru. Uwo muntu yahise ahunga, ariko nyuma aza gusangwa yapfuye hafi y’aho igitero cyabereye.
Kugeza ubu, umwirondoro w’uwapfuye nturamenyekana.
Mu rwego rw’iperereza, Polisi ya Uganda yataye muri yombi abantu bane bakekwaho kugira uruhare muri icyo gitero. Ni Irumba Simon, Kiiza Abson, Kadama George na Baluku Lenaxi.
Polisi kandi yafashe umupanga bivugwa ko wakoreshejwe muri icyo gitero, mu gihe umurambo w’uwapfuye wajyanywe mu buruhukiro bw’ibitaro kugira ngo ukorerwe isuzuma.
Iperereza rirakomeje, aho inzego z’umutekano zikomeje gushakisha abandi bakekwaho kugira uruhare muri iki gikorwa, cyane cyane abashobora kuba batorotse.
Polisi yasabye abaturage bafite amakuru ashobora gufasha mu kumenya cyangwa gufata abakekwaho kugira uruhare muri iki gitero kuyageza kuri sitasiyo ya Polisi ibegereye.