Connect with us

Amakuru

Gisagara: Ubusinzi n’abakobwa bareresha ababyeyi babo, intandaro yo kudacika kw’imirire mibi

Published

on

Ubuyobozi bw’akarere ka Gisagara buravuga ko ubusinzi bugaragara ku babyeyi bamwe na bamwe no kuba hari abakobwa babyara batabana n’abagabo, abana bakabazanira ababyeyi, bigira uruhare mu kudacika kw’ikibazo cy’imirire mibi igaragara muri aka karere, dore ko ngo bituma abana batitabwaho uko bikwiye.

Ibi biherutse kugarukwaho n’umuyobozi w’akarere ka Gisagara, Rutaburingoga Jerome, mu kiganiro n’abanyamakuru.

Mayor Rutaburingoga avuga ko iki kibazo giterwa n’impamvu nyinshi, by’umwihariko kigaterwa n’ababyeyi basinda ntibite ku bana babo, ndetse n’ abakobwa babyara, bakazanira abana ababyeyi babo kandi wenda ari imiryango idashoboye, bigatuma abana bagerwaho n’iki kibazo cy’imirire mibi.

Ati “ariko akenshi usanga imirire mibi iterwa n’uruhare rw’ababyeyi, ntabwo ari ikibazo cya Leta; ahubwo ni ukwigisha abo babyeyi benshi usanga ari abasinzi, abandi[bana] bavutse mu buryo butateganijwe. Umwana akabyarira nk’i Kigali akazanira umwana nyirakuru, nyirakuru kumurera nawe muri za ntege nke, tukahasanga imirire mibi..”.

Ubuyobozi bw’akarere ka Gisagara bwavugaga ko abana bagera kuri 500 mu mwaka ushize wa 2016 aribo babarurwagaho kugira iki kibazo.

Niyikiza Odette, umukuru w’umudugudu wa Gitwa, akagari ka Minazi, Umurenge wa save, mu mpamvu yakekaga ko yaba ariyo nyirabayazana w’imirire mibi mu baturage , ngo ni uko bahorera ku ndyo imwe gusa .

[xyz-ihs snippet=”google-pub”]

Ati “ikibazo cy’imirire mibi rero nta bijumba bihari, nta myumbati ihari, mbese imirire mibi irajyana no kurya indyo imwe gusa, kandi indyo imwe ntitunga”.

Ubuyobozi bw’akarere buvuga ko ari ikibazo kitaranduka, dore ko ngo bagabanuka mu gihe gito, nyuma y’ikindi gihe hakagaragara abandi bana bafite iki kibazo.

Ubu igishyizwe imbere ngo ni ugukaza ingamba zo kwigisha ababyeyi kwita ku bana kandi hakifashishwa n’igikoni cy’umudugudu n’ibindi, kugira ngo iki kibazo kibe cyacika.

Umuyobozi w’akarere Rutaburingoga Jerome ati “abarimo[mu kibazo cy’imrire mibi] turabaha ibiryo mu gikoni cy’umudugudu bakavamo, hari n’amata atangwa ku bigo nderabuzima no mu mashuri, ubu dufite abana bagera ku bihumbi 9 bahabwa amata mu bigo by’amashuri abanza, ibi rero ni ingamba zihari kugira ngo abantu bave mu mirire mibi, hamwe no kwigisha mu buryo busanzwe”.

Akomeza agira ati “ikibazo si icy’abo baba bagaragaye, ahubwo ni ukurinda abandi ko bazongera bakayijyamo”.

Iki kibazo cy’abana bakigaragarwaho n’imirire mibi, gihangayikishije igihugu muri rusange; dore ko umwaka ushize mu gihugu hose habarurwaga abana bagwingiye bitewe n’imirire mibi, bagera kuri 38%; intego ikaba ari uko uyu mubare ugabanuka bakagera kuri 17% mu mwaka wa 2018.

Kanda hano ujye ubona amakuru yihuse kandi kugihe kuri Facebook no kuri twitter

N.Jean Claude/Bwiza.com

Advertisement
TANGA IGITEKEREZO

Leave a Reply

Your email address will not be published. Required fields are marked *