Connect with us

Imikino

Byinshi utari uzi kuri Lionel Messi wongereye amasezerano muri FC Barcelona

Published

on

Rutahizamu wa FC Barcelona ukomoka mu gihugu cya Algentine, Lionel Messi , niwe mukinnyi wenyine uvuka hanze ya Espagne umaze kuyikinira imikino irenga 600, uyu mukinnyi akaba yongereye amasezerano n’iyi kipe azamugeza 2021.

Lionel Andreas Messi Cuccitini w’imyaka 30, yaboneye izuba i Rosario mu Majyaruguru ya Algentine ku wa 24 Kamena 1987, avuka kuri Jorge Haoracio Messi na Celia Maria Cuccitini, ni umwana wa gatatu mu muryango w’abana bane, bakuru be babiri Rodrigo na Matias na mushikiwe muto, Maria Sol.

Messi mu bwana bwe ntiyari ashishikajwe n’amasomo dore ko yari igifura kandi adakunda kuvuga ahubwo yahoranaga umupira ku kirenge cye yaba mu muhanda ndetse no mu rugo, yaje kubifashwamo na se umubyara dore ko yari afite agakipe ko mu cyaro cya Grandoli yatozagamo, aka gakipe kakinagagamo abavandimwe babiri ba Messi.

Messi ntiyatinze kwerekana impano ye kuva 1995 ubwo yakinaga muri Newell’s Old Boys abenshi batangiye kumugereranya n’igihangange muri ruhago, Diego Maradona dore ko yafashije iyi kipe gutwara ibikombe bitandatu kandi atorwa nk’umukinnyi mwiza.

Messi igihagararo cye cyari ikibazo dore ko ku myaka 11 yari afite indeshyo nkiy’umwana w’ imyaka 9 , byaje kuba agahomamunwa ubwo umuganga w’iyi kipe y’abato, Dr Diego Schwartzstein yatangazaga ko Messi afite ikibazo cy’imisemburo mike ituma adakura.

Uyu muganga yavuze ko nibatamwongereye iyindi misemburo ko atazarenza metero 1.5, ibi byari bigoye cyane umuryango w’abubatsi Messi avukamo dore ko iyo miti yari ihenze cyane.

[xyz-ihs snippet=”google-pub”]

Mu 1997 yaje kuvurwa ku bufatanye n’ikipe ya FC Barcelona binyuze kuri Johan Cruyff wayoboraga iyi kipe, we bamubonagamo impano idasanzwe kandi yabonaga azamusimburira igihangange Diego Maradona na we wakiniye iyi kipe .

Messi yageze i Barcelona ku myaka 13, hari mu mwaka wa 2000 gusa nyuma y’ibiganiro byafashe amezi menshi muri Werurwe 2001 nibwo yasinye amasezerano mu ikipe ya Fc Barca. Ishuri ryigisha umupira rya Barca La Mazia rimwakira 2001−2004.

Kuva 2004 nibwo yatangiye gukina nk’uwabigize umwuga muri FC Barcelona, yatwaranye n’iyi kipe ibikombe 17 muri Espagne ndetse no ku rwego mpuzamahanga, uyu mukinnyi ufite imipira 5 ya zahabu yongereye amasezerano azamugeza 2021 kuri miliyoni 80 z’amapawundi asaga miliyari 91 z’amanyarwanda.

Ibindi utari uzi kuri Messi, yihariyeho:

  1. Messi niwe mukinnyi wenyine uvuka hanze ya Espagne wakiniye FC Barcelone imikino myinshi 602
  2. Messi ni umwe mu bakinnyi batatu bamaze gukinira FC Barcelona imikino 600 mu marushanwa yose nyuma ya Inesta na Xavi
  3. Messi mu mateka ya shampiyona ya Espagne, niwe umaze kutsinda ibitego byinshi, 361.
  4. Messi niwe mukinnyi umaze gutsindira ikipe ye ibitego byinshi mu mateka ya Shampions League 97
  5. Messi niwe mukinnyi wenyine umaze gutsinda ibitego byinshi mu mwaka umwe wa shampiyona ya Espagne 2012− 2013 aho yatsinze ibitego 50
  6. Messi niwe mukinnyi ufite ibitego byinshi mu mukino uzwi nka El Clasico ibitego 24.

[xyz-ihs snippet=”google-pub”]

Kanda hano ujye ubona amakuru yihuse kandi kugihe kuri Facebook no kuri twitter

Kalawo M.Eliezer/Bwiza.com

 

 

Advertisement
TANGA IGITEKEREZO

Leave a Reply

Your email address will not be published. Required fields are marked *