Abakinnyi bane barimo batatu mu bo Rayon Sports yakinishije mu mukino wayihurije na Rutsiro FC wabereye mu Karere ka Rubavu, bagaragayeho icyorezo cya Covid-19.
Nk’uko umunyamakuru wa Radio B&B Umwezi mu ishami ry’imikino, Jean Luc Imfurayacu yatangaje aya makuru mu masaha atanu ashize , abakinnyi banduye iki cyorezo ni: Ndizeye Samuel, Amran Nshimiyimana, Rudasingwa Prince na Habimana Hussein.
Uyu munyamakuru yavuze ko hari n’abandi bakinnyi 9 bongera gupimwa iki cyorezo.
Igitangazamakuri Igihe mu gushimangira ko iki cyorezo cyageze mu bakinnyi ba Rayon Sports, cyatangaje ko cyavuganye n’umwe mu bakinnyi b’iyi kipe, yemeza ko ari ukuri.
Ngo aya makuru yamenyekanye ubwo umukino wa Rayon Sports na Rutsiro FC wari ukomeje, haba ubwumvikane buke ku ngingo yo kuwuhagarika, urinda urangira.
Andi makuru avuga ko Rayon Sports yaherekejwe na Polisi y’Igihugu ubwo yavaga mu Karere ka Rubavu, iyigeza mu Nzove aho yagiye mu kato yose nk’ikipe, ikaba ikamaramo iminsi iri hagati y’3 n’5.
Abakinnyi Rayon Sports yakinishije mu mukino wayihuje na Rutsiro
Ababanje mu mukino: Kwizera Olivier, Rugwiro Hervé, Niyibizi Emmanuel, Habimana Hussein, Ndizeye Samuel, Ourega Vital, Nishimwe Blaise, Oumar Sidibé, Drissa Dagnogo, Iranzi Jean Claude, na Niyonkuru Sadjati .
Tanga igitekerezo